उत्तर प्रदेशातील मुरादाबाद येथे झालेल्या स्थानिक क्रिकेट स्पर्धेदरम्यान एक हृदयद्रावक घटना घडली आहे. सामन्याचा शेवटचा चेंडू टाकल्यानंतर मुरादाबादचा डावखुरा वेगवान गोलंदाज अहमर खान (वय ५०) याला हृदयविकाराचा झटका आला आणि तो मैदानावर कोसळला. उपस्थितांनी तत्काळ मदत करत सीपीआर दिला आणि रुग्णवाहिकेतून रुग्णालयात नेले, मात्र डॉक्टरांनी त्याला मृत घोषित केले.

ही घटना मुरादाबादच्या बिलारी ब्लॉकमधील शुगर मिल मैदानावर घडली. येथे यूपी व्हेटरन्स क्रिकेट असोसिएशन तर्फे सुरू असलेल्या स्पर्धेत मुरादाबाद आणि संभल संघांमध्ये सामना खेळला जात होता. मुरादाबाद संघाने प्रथम फलंदाजी करून चांगला स्कोअर उभारला होता. संभल संघाला लक्ष्याचा पाठलाग करताना शेवटच्या चार चेंडूत १४ धावा आवश्यक होत्या.

निर्णायक क्षणी गोलंदाजीसाठी मुरादाबादचा अनुभवी डावखुरा गोलंदाज अहमर खान आला. त्याने तडफदार गोलंदाजी करत एकही चौकार न देता सामना मुरादाबादच्या नावावर ११ धावांनी मिळवून दिला. विजयाचा आनंद साजरा होण्याआधीच दुर्दैवी घटना घडली. शेवटचा चेंडू टाकल्यानंतर अहमर खान मैदानावर बसला आणि काही क्षणांतच कोसळला.

त्याचा श्वास थांबल्याचे पाहून सहकारी खेळाडू आणि प्रेक्षकांमध्ये खळबळ उडाली. तिथे उपस्थित असलेल्या एका डॉक्टरने तत्काळ सीपीआर दिले, त्यानंतर थोडी हालचाल दिसली, मात्र रुग्णालयात दाखल केल्यानंतर डॉक्टरांनी त्याला मृत घोषित केले.

अहमर खान मुरादाबादच्या एकता विहार कॉलनीत राहत होता. तो उत्तर विभागाचा अनुभवी खेळाडू होता आणि नुकताच एका महत्त्वाच्या स्पर्धेतून परतला होता. त्यांच्या पश्चात पत्नी, दोन मुले, एक भाऊ आणि एक बहीण असा परिवार आहे.

या घटनेने संपूर्ण स्थानिक क्रिकेट विश्वात शोककळा पसरली आहे. सहकारी खेळाडूंसह चाहत्यांनी सोशल मीडियावरून त्यांच्या निधनाबद्दल दुःख व्यक्त केले असून, “मैदानावर लढत जीव दिला, खराखुरा क्रिकेटचा योद्धा!” अशी भावना व्यक्त केली जात आहे.