हैद्राबाद: तेलंगणाची राजधानी हैद्राबादमधून सध्या मोठी बातमी समोर येत आहे. प्रसिद्ध चारमिनारजवळील एका घरात भीषण आग लागली आहे. गुलजार हाऊसच्या एका इमारतीत ही आग लागली आहे. ही घटना रविवारी सकाळी ६ वाजता घडल्याचे सांगण्यात येत आहे.

आगीवर नियंत्रण मिळविण्यासाठी अग्निशमन दलाच्या ११ गाड्या घटनास्थळी दाखल झाल्या आहेत. या अपघातात १७ जणांचा मृत्यू झाला आहे. दरम्यान, आगीचे कारण अद्याप समजू शकलेले नाही, असं अग्निशमन दलाच्या अधिकाऱ्यांनी सांगितलं आहे.

तेलंगणाचे मुख्यमंत्री ए रेवंत रेड्डी यांनी या घटनेवर शोक व्यक्त केले आहे. इमारतीत अडकलेल्या लोकांना वाचवण्यासाठी आवश्यक ती सर्व पावले उचलण्याचे निर्देश त्यांनी वरिष्ठ अधिकाऱ्यांना दिले.

१७ जणांचा मृत्यू

तेलंगणा अग्निशमन आपत्ती प्रतिसाद आपत्कालीन आणि नागरी संरक्षण विभागाने १७ जणांच्या मृत्यूची पुष्टी केली आहे. सर्व मृतांच्या नावांची यादीही जाहीर करण्यात आली आहे.

मृतांच्या कुटुंबियांना २ लाख रुपये

पंतप्रधान मोदींनीही या अपघाताबद्दल शोक व्यक्त केले आहे. पंतप्रधान कार्यालयाने जारी केलेल्या निवेदनानुसार, अपघातात मृत्युमुखी पडलेल्यांच्या कुटुंबियांना २ लाख रुपयांची भरपाई जाहीर करण्यात आली आहे, तर जखमींना ५० हजार रुपयांची मदत जाहीर करण्यात आली आहे.

दरम्यान, केंद्रीय मंत्री जी किशन रेड्डी यांनीही घटनास्थळी भेट दिली आहे. ते म्हणाले, 'पोलिसांनी आगीच्या घटनेत अनेक लोकांचा मृत्यू झाल्याची माहिती दिली आहे परंतु याची पुष्टी संबंधित अधिकाऱ्यांकडूनच केली जाईल. मृतांमध्ये काही मुलांचाही समावेश असल्याचं त्यांनी सांगितलं.