Loksabha Election 2024: लोकसभा निवडणुकीतील अंतिम टप्प्यातील मतदान उद्या म्हणजेच 1 जून रोजी होत आहे. आतापर्यंत सहा टप्प्यातील मतदान पार पडले आहे. पंतप्रधान नरेंद्र मोदींचा विजयीरथ विरोधकांना रोखायचा आहे. तर दुसरीकडे, पंतप्रधान मोदींच्या नेतृत्वाखाली भाजपला विजयाची हॅट्ट्रिक लगावयाची आहे. लोकसभा निवडणुकीच्या तब्बल दोन महिन्यांच्या कालावधीत पंतप्रधानांनी 200 पेक्षा जास्त रॅली केल्या. याशिवाय, मोदींनी विविध प्रसारमाध्यमांना मुलाखती दिली. यादरम्यान त्यांनी अशी अनेक वक्तव्य केली, ज्यावरुन विरोधकांनी त्यांचा समाचार घेतला. पंतप्रधान मोदींनी नुकत्याच दिलेल्या मुलाखतीत महात्मा गांधी यांच्याविषयी केलेल्या वक्तव्यानंतर विरोधकांच्या हाती आयतं कोलित मिळालं.

दरम्यान, आता काँग्रेस अध्यक्ष मल्लिकार्जुन खर्गे यांनी पंतप्रधान नरेंद्र मोदी यांच्या महात्मा गांधींबाबत केलेल्या वक्तव्यावर निशाणा साधला. ते म्हणाले की, ‘पीएम मोदी हे गुजरातचे आहेत. गुजरातमधील एखाद्याला गांधीजींबद्दल माहिती नसेल आणि त्यांचा प्रचारही केला नसेल, तर मी काय बोलू? आरएसएसचे (RSS) स्वंयसेवक असताना तुम्ही तुमची विचारधारा आणि तत्त्वांचा प्रचार केला, पण महात्मा गांधींसाठी तुम्ही काहीही केले नाही.’ गेल्या 23 वर्षांत तुम्ही काय केले, असा सवालही खर्गे यांनी यावेळी उपस्थित केला. खर्गे पुढे म्हणाले की, तुम्ही गोडसे प्रिय आहात, तुम्ही गांधी प्रिय असू शकत नाहीत.

प्रसारमाध्यमाला दिलेल्या मुलाखतीत पंतप्रधान मोदी म्हणाले होते की, 'महात्मा गांधी महान व्यक्ती होते. या 75 वर्षात सर्व जगाला महात्मा गांधी माहीत करुन देण्याची जबाबदारी आपली नव्हती का? मला सांगायला वाईट वाटते की त्यांच्याबद्दल कोणालाच माहिती नव्हती. ‘गांधी’ हा चित्रपट आल्यानंतर जगभरात त्यांच्याबद्दल जाणून घेण्याची उत्सुकता वाढली. या वक्तव्याबाबत पंतप्रधान मोदींविरोधात पोलिसात तक्रार दाखल करण्यात आली आहे. राष्ट्रीय पुरस्कार विजेते चित्रपट निर्माते लुईत कुमार बर्मन यांनी गुवाहाटी येथील हाटीगांव पोलीस (Police) ठाण्यात तक्रार दाखल केली असून, मोदींनी राष्ट्रपिता महात्मा गांधी यांच्याबद्दल अत्यंत अपमानास्पद वक्तव्य केल्याचा आरोप केला आहे.