Girl Accidentally Drinks Acid Kanpur: उत्तर प्रदेशातील कानपूरमधून अंगावर शहारे आणणारी एक घटना समोर आली. एका छोट्याशा निष्काळजीपणामुळे एका तरुणीवर कठीण प्रसंग ओढावला. घरात ठेवलेले ॲसिड चुकून 'कोल्ड ड्रिंक' समजून प्यायल्यामुळे या तरुणीची अन्ननलिका आणि गळा पूर्णपणे भाजला गेला. या एका चुकीने तिचे आयुष्य अक्षरशः उद्ध्वस्त होण्याच्या मार्गावर होते, मात्र डॉक्टरांच्या अथक परिश्रमामुळे आठ महिन्यांनंतर तिला आता नवे जीवन मिळाले.

कानपूरच्या सुपर स्पेशालिटी हॉस्पिटलमधील (Hospital) गॅस्ट्रो विभागाचे प्रमुख डॉ. विनय कुमार यांनी दिलेल्या माहितीनुसार, ही तरुणी मूळची उन्नावची राहणारी आहे. तिने घरात कोल्ड ड्रिंकच्या बाटलीत ठेवलेले ॲसिड चुकून प्यायले होते. ॲसिड शरीरात जाताच तिच्या गळ्याला आणि अन्ननलिकेला गंभीर जखमा झाल्या. सुरुवातीला सामान्य उपचार करण्यात आले, परंतु काही दिवसांनंतर तिची प्रकृती अधिकच खालावली. तिची अन्ननलिका आकसली गेल्यामुळे तिला अन्न गिळणे अशक्य झाले होते. वेदना इतक्या असह्य होत्या की तिला साधे पाणी पिणेही कठीण झाले होते. सततच्या उपासमारीमुळे तिचे वजन घटून अवघे 29 किलो राहिले होते.

तरुणीची गंभीर अवस्था पाहून डॉक्टरांच्या पथकाने तिच्यावर दीर्घकाळ उपचार करण्याचा निर्णय घेतला. गेल्या आठ महिन्यांपासून एंडोस्कोपीच्या माध्यमातून अनेकदा ‘डायलेटर’ प्रक्रिया करण्यात आली. या प्रक्रियेद्वारे तिची आकसलेली अन्ननलिका हळूहळू रुंद करण्यात आली. सातत्यपूर्ण देखरेख, योग्य औषधोपचार आणि डॉक्टरांच्या जिद्दीमुळे अखेर तिच्या प्रकृतीत सुधारणा झाली. सध्या या तरुणीचे वजन 29 किलोवरुन वाढून 45 किलो झाले असून ती आता सामान्यपणे जेवण करु शकत आहे.

या घटनेनंतर डॉक्टरांनी सर्वसामान्यांना एक गंभीर इशारा दिला. घरामध्ये टॉयलेट क्लिनर, ॲसिड किंवा इतर कोणतीही धोकादायक रसायने कधीही पाणी किंवा कोल्ड ड्रिंकच्या बाटल्यांमध्ये भरुन ठेवू नका, असे आवाहन त्यांनी केले. अनेकदा घरातील सदस्य किंवा मुले या बाटल्यांमध्ये पिण्याचे पदार्थ आहेत असे समजून ते पितात, ज्यामुळे असे जीवघेणे अपघात घडतात. अशा वस्तू नेहमी सुरक्षित ठिकाणी आणि मुलांच्या हाताला लागणार नाहीत अशा उंचीवर ठेवाव्यात, कारण तुमची एक छोटीशी चूक कोणाचे तरी आयुष्य कायमचे संपवू शकते.