Farooq Abdullah On Lord Ram: जम्मू-काश्मीरचे माजी मुख्यमंत्री फारुक अब्दुल्ला यांनी मंगळवारी (13 डिसेंबर) दिल्लीतील एका कार्यक्रमादरम्यान भगवान राम आणि पाकिस्तानबाबत वक्तव्य केले. अब्दुल्ला म्हणाले की, 'भगवान राम हे केवळ भारत आणि हिंदू धर्माचे नाहीत तर संपूर्ण जगाचे आणि सर्वांचे आहेत.' त्याचबरोबर ते म्हणाले की, 'कुराण कुणा एकाचे नाही, ते सर्वांचे आहे.'

दरम्यान, तवांगमध्ये भारत (India) आणि चीनच्या सैनिकांमध्ये झालेल्या संघर्षावर माजी मुख्यमंत्री फारुख अब्दुल्ला म्हणाले की, 'चीनसोबत चर्चा व्हायला हवी.' ते पुढे म्हणाले की, 'जोपर्यंत पाकिस्तानशी आपले संबंध सुधारणार नाही, तोपर्यंत देशात शांतता नांदणार नाही. मुस्लिमांना (Muslim) देशद्रोही मानले जात आहे. आम्ही देशद्रोही नाही, आम्ही भारतीय आहोत. काश्मीर कठीण टप्प्यातून जात आहे, याचे उत्तर सत्तेत असलेल्यांनी द्यावे.'

केंद्र सरकारवर निशाणा साधला

नॅशनल कॉन्फरन्सचे अध्यक्ष फारुख अब्दुल्ला यांनी दोन दिवसांपूर्वी सांगितले होते की, 'जोपर्यंत जम्मू-काश्मीरमधील लोकांच्या मूलभूत अधिकारांची हमी मिळत नाही, तोपर्यंत त्यांचा विकास होऊ शकत नाही.'