इंदूर: आयसीसी महिला विश्वचषकासाठी (ICC Women's World Cup) भारतात आलेल्या ऑस्ट्रेलियन संघातील दोन महिला क्रिकेटपटूंना इंदूर शहरात अत्यंत वाईट अनुभवाला सामोरं जावं लागलं. हॉटेलमधून कॅफेकडे पायी जात असताना काही अज्ञात व्यक्तींनी त्यांच्यासोबत गैरव्यवहार करत छेडछाड केल्याची धक्कादायक घटना गुरुवारी (दि.२३) घडली. या घटनेमुळे आंतरराष्ट्रीय स्पर्धेदरम्यान खेळाडूंच्या सुरक्षेचा गंभीर प्रश्न निर्माण झाला आहे.

मिळालेल्या माहितीनुसार, ऑस्ट्रेलियन संघ ज्या रॅडिसन ब्लू हॉटेलमध्ये थांबला आहे, तेथून गुरुवारी सकाळी दोन महिला क्रिकेटपटू जवळच्या एका कॅफेकडे पायी जात होत्या. खजराना रोड परिसरात असताना, एका मोटारसायकलवरील व्यक्तीने त्यांचा पाठलाग सुरू केला. त्याने कथितरित्या त्यांच्याशी अयोग्य वर्तन केले आणि त्वरित घटनास्थळावरून पळ काढला.

त्वरित 'एसओएस' (SOS) आणि पोलीस कारवाई

या गंभीर प्रकारानंतर दोन्ही क्रिकेटपटूंनी त्वरित टीमच्या सुरक्षा व्यवस्थापकाला एसओएस नोटिफिकेशन पाठवले. संघाचे सुरक्षा व्यवस्थापक डॅनी सिमन्स यांनी तातडीने स्थानिक सुरक्षा अधिकाऱ्यांशी संपर्क साधला आणि मदतीसाठी वाहन घटनास्थळी पाठवले. माहिती मिळताच, सहायक पोलीस आयुक्त (ACP) हिमानी मिश्रा यांनी दोन्ही खेळाडूंना भेटून त्यांचे जबाब नोंदवले.

गुरुवारी संध्याकाळी सिमन्स यांनी एमआयजी पोलीस स्टेशनमध्ये तक्रार दाखल केली. पोलिसांनी घटनेची गंभीरता लक्षात घेऊन तातडीने एफआयआर नोंदवली आणि भारतीय न्याय संहिता (BNS) च्या कलम ७४ (स्त्रीच्या विनयशीलतेला बाधा आणण्यासाठी फौजदारी बळाचा वापर) आणि कलम ७८ (पाठलाग करणे) अंतर्गत गुन्हा दाखल केला.

आरोपीला अटक, गुन्हेगारी पार्श्वभूमी उघड

पोलिसांनी केलेल्या तातडीच्या तपासात या घटनेतील आरोपीला अटक करण्यात यश आले आहे. सुदैवाने, छेडछाड होत असताना एका प्रत्यक्षदर्शीने आरोपीच्या मोटारसायकलचा नंबर नोंदवून घेतला होता. या माहितीच्या आधारे पोलिसांनी आरोपी अकील खान याला अटक केली.

उपनिरीक्षक निधी रघुवंशी यांनी माहिती दिली की, अटक केलेल्या खानच्या विरोधात यापूर्वीही गुन्हे दाखल आहेत. पोलीस या प्रकरणाचा अधिक तपास करत असून, खान याच्या मागील गुन्हेगारी पार्श्वभूमीचीही चौकशी सुरू आहे. आंतरराष्ट्रीय खेळाडूंसोबत अशा प्रकारची घटना घडल्याने इंदूर पोलीस प्रशासनाने या प्रकरणाला गांभीर्याने घेतले असून, खेळाडूंच्या हॉटेल आणि परिसराची सुरक्षा अधिक कडक करण्यात आली आहे.