Another Murder Like Shraddha Walker: देशातील हायटेक सिटी हैदराबादमधून श्रद्धा खून प्रकरणासारखे आणखी एक प्रकरण समोर आले आहे. दिल्लीतील श्रद्धा खून प्रकरणाप्रमाणेच हैदराबाद येथील आरोपीने ही घटना घडवून आणली आहे.

बी चंद्रमोहन असे आरोपीचे नाव असून त्याचे वय 48 वर्षे आहे. तर, मृत महिला 55 ​​वर्षांची आहे. पोलिसांच्या तपासात आरोपीने 12 मे रोजी हा जघन्य गुन्हा केल्याचे निष्पन्न झाले.

काय आहे संपूर्ण प्रकरण?

पोलिसांनी (Police) दिलेल्या माहितीनुसार, आरोपीने मृत व्यक्तीकडून 7 लाख रुपये घेतले होते. पीडितेने त्याच्याकडे या पैशांची मागणी केली असता त्याने टाळाटाळ सुरु केली.

पीडिता आरोपींवर पैशांसाठी दबाव टाकत होती. त्यामुळे चंद्रमोहनला खूप राग आला.

आरोपीचे या महिलेशी पूर्वीपासून संबंध होते. चंद्रमोहनला पीडितेने तिच्याच घराच्या दुसऱ्या मजल्यावर राहण्यासाठी जागा दिली होती.

12 मे रोजी आरोपीने ही हत्या केल्याचे पोलीस तपासात समोर आले असून, पीडितेवर चाकूने अनेक वेळा हल्ला करण्यात आला होता.

अशाप्रकारे या घटनेचा छडा लावण्यात आला

चाकू हल्ला इतका जीवघेणा होता की, महिलेचा जागीच मृत्यू झाला. यानंतर चंद्रमोहनने मृत महिलेच्या मृतदेहाचे 22 तुकडे केले.

तपासात आरोपीच्या घरातून दगड कापण्याचे हत्यार सापडले. चंद्रमोहनने मृतदेहाचे तुकडे करुन फ्रीजमध्ये लपवले. तर, डोके डम्पिंगच्या ठिकाणी फेकले होते.

15 मे रोजी आरोपीने मृत महिलेचा शिरच्छेद केला होता. त्यानंतर तिच्या कुटुंबीयांना फोन करुन ती जिवंत असल्याची खात्री दिली होती.

दिल्लीतही (Delhi) अशीच एक घटना समोर आली होती, ज्यात लिव्ह-इनमध्ये राहणाऱ्या आफताबने त्याची गर्लफ्रेंड श्रद्धा वालकरच्या मृतदेहाचे 35 तुकडे करुन जंगलात फेकून दिले होते.