जम्मू-काश्मीरमध्ये गुरुवारी लष्कराने पुन्हा एकदा दहशतवाद्यांचा नापाक डाव उद्ध्वस्त केला. कुलगाममध्ये सुरु असलेल्या कारवाईत लष्कराने दोन दहशतवाद्यांचा खात्मा केला आहे. हिंदू महिला शिक्षिका रजनी बाला यांच्या हत्येमध्ये या दहशतवाद्यांचा सहभाग असल्याचे सांगण्यात येत आहे. दुसरीकडे, अनंतनागमध्येही हिजबुल मुजाहिद्दीनचे दोन दहशतवादी असल्याची माहिती मिळाली आहे. लष्कराने परिसराची नाकेबंदी करुन कारवाई सुरु केली आहे. (hindu teacher rajni bala murderer terrorists killed in kulgam encounter)

दरम्यान, काश्मीर झोनच्या पोलीस अधिकाऱ्याकडून मिळालेल्या माहितीनुसार, बुधवारपासून कुलगाममध्ये दहशतवाद्यांविरोधात कारवाई करण्यात आली. 24 तासांहून अधिक काळ चाललेल्या या कारवाईत लष्कराच्या जवानांनी दोन दहशतवाद्यांचा खात्मा केला आहे. हिंदू शिक्षिका रजनी बाला यांच्या हत्येत या दहशतवाद्यांचा (Terrorists) हात असल्याचे सांगण्यात येत आहे.

दहशतवाद्यांनी शाळेत घुसून गोळीबार केला

31 मे रोजी कुलगाम जिल्ह्यातील गोपालपोरा हायस्कूलमध्ये महिला शिक्षिका रजनी बाला (Rajni Bala) यांना दहशतवाद्यांनी लक्ष्य केले होते. शाळेत घुसलेल्या दहशतवाद्यांनी त्यांचा मृतदेह गोळ्यांनी छिन्नविछिन्न केला होता. या भ्याड हल्ल्यात त्यांचा मृत्यू झाला.

अनंतनागमध्ये हिजबुलच्या दोन दहशतवाद्यांशी चकमक

आयजीपी काश्मीर विजय कुमार यांनी सांगितले की, अनंतनाग (Anantnag) जिल्ह्यातील हंगलगुंड भागात दहशतवादी आणि सुरक्षा दलांमध्ये चकमक सुरु झाली आहे. निवासी भागात दोन ते तीन दहशतवादी लपून बसल्याचा संशय आहे. अनंतनागच्या कोकरनाग भागात हिजबुल मुजाहिद्दीनचे दोन दहशतवादी लपले होते. त्यांच्याशी चकमक सुरुच आहे.