गुजरातचे आमदार जिग्नेश मेवाणी यांना आसाममधील कोक्राझार कोर्टातून जामीन मिळाला आहे. गेल्या आठवड्यात आमदार जिग्नेश मेवाणी यांना अचानक अटक करण्यात आली. पंतप्रधान नरेंद्र मोदी (Prime Minister Narendra Modi) यांच्या विरोधात ट्विट केल्याप्रकरणी त्यांच्या विरोधात गुन्हा दाखल करण्यात आला होता. कोक्राझार येथील न्यायालयाने रविवारी गुजरातचे अपक्ष आमदार जिग्नेश मेवाणी (Gujarat MLA Jignesh Mewani) यांना एक दिवसाची न्यायालयीन कोठडी सुनावली होती. पंतप्रधानांविरोधात ट्विट केल्याप्रकरणी आसाम पोलिसांनी मेवाणी यांना बुधवारी गुजरातमधून अटक केली होती. यानंतर ते तीन दिवस पोलिस कोठडीत होते.

दरम्यान, रविवारी सायंकाळी उशिरा त्यांना न्यायालयात हजर करण्यात आले. रात्री 9.30 वाजेपर्यंत दोन तासांहून अधिक वेळ या प्रकरणी युक्तिवाद चालला. सीजेएम यांच्या निवासस्थानी या प्रकरणाची सुनावणी झाली. मेवाणी यांच्या समर्थनार्थ काँग्रेसने धरणे आंदोलन केले होते. रविवारी आसाम प्रदेश काँग्रेस (Congress) कमिटीचे अध्यक्ष भूपेन बोरा, आमदार दिगंता बर्मन आणि एसके रशीद यांनी पक्ष कार्यालयापासून कोक्राझार पोलीस ठाण्यापर्यंत मूक मोर्चा काढला.

तसेच, काँग्रेस समर्थित अपक्ष आमदार मेवाणी यांना बुधवारी रात्री गुजरातमधील (Gujarat) पालनपूर येथून अटक करण्यात आली. त्यानंतर आसामधील कोक्राझार पोलीस ठाण्यात आयपीसी आणि आयटी कायद्याच्या कलमांखाली पंतप्रधानांविरुद्ध केलेल्या कथित ट्विटवरुन एफआयआर दाखल करण्यात आला. एफआयआरमध्ये, त्यांनी आपल्या ट्विटमध्ये म्हटले होते की, पीएम मोदी "गोडसेला देव मानतात".