Ghaziabad News: गाझियाबाद पोलिसांनी परराष्ट्र मंत्रालयात काम करणाऱ्या एका व्यक्तीला हेरगिरीच्या आरोपाखाली अटक केली आहे. अहवालानुसार, नवीन पाल नावाच्या या व्यक्तीला क्रॉसिंग रिपब्लिक परिसरातून पोलिसांनी इंटेलिजन्स ब्युरोकडून माहिती मिळाल्यानंतर अटक केली.

नवीन पाल याच्या विरोधात नोंदवलेल्या एफआयआरमध्ये म्हटले आहे की, त्याने परराष्ट्र मंत्रालयाची कागदपत्रे आणि G20 बैठकीशी संबंधित गोपनीय माहिती पाकिस्तानातील कराची येथील एका व्यक्तीला दिली. व्हॉट्सअॅपच्या माध्यमातून ही माहिती देण्यात आली.

सोशल मीडियाच्या माध्यमातून कर्मचारी महिलेच्या संपर्कात आला

तपासादरम्यान नवीन पाल सोशल मीडियाच्या (Social Media) माध्यमातून एका महिलेच्या संपर्कात आल्याचे आढळून आले. त्यानंतर तो तिच्याशी व्हॉट्सअॅपवरुन बोलू लागला. सुरुवातीला महिलेचा नंबर उत्तर प्रदेशातील बरेलीचा असल्याचे निष्पन्न झाले. मात्र, नंबरचा आयपी अॅड्रेस ट्रेस केल्यावर तो कराचीचा असल्याचे निष्पन्न झाले.

दुसरीकडे, नवीनच्या मोबाईलवर परराष्ट्र मंत्रालय आणि G20 संबंधित अनेक कागदपत्रे पोलिसांना सापडली आहेत. या फाईल्स 'सिक्रेट' नावाने सेव्ह करण्यात आल्याचे पोलिसांनी सांगितले. याशिवाय, पोलिसांनी सांगितले की, ते राजस्थानमधील (Rajasthan) अलवर येथील एका महिलेचा शोध घेत आहेत, जिने नवीनच्या खात्यात काही रक्कम डिजिटली ट्रान्सफर केली होती.