अहमदाबादच्या शाहीबाग भागातील 11 मजली इमारतीच्या सातव्या मजल्यावरील फ्लॅटमध्ये आग लागली. या अपघातात एका 15 वर्षीय मुलीचा मृत्यू झाला आहे. तब्बल 25 मिनिटे ती बाल्कनीत अडकून पडली होती, वाचवण्यासाठी ती लोकांकडे विनवणी करत होती, पण तिला वाचवता आले नाही. या घटनेचे एक धक्कादायक व्हिडिओही समोर आला आहे. दिलासादायक बाब म्हणजे कुटुंबातील चार जणांचा जीव वाचला असून, त्यांच्यावर उपचार सुरू आहेत. या आगीचे कारण अद्याप समजू शकले नाही.

पोलिसांनी दिलेल्या माहितीनुसार, शाहीबाग येथील गिरधर नगर सर्कलजवळ असलेल्या ऑर्किड ग्रीन फ्लॅटच्या सातव्या मजल्यावर आग लागली. याबाबत अहमदाबाद फायर ब्रिगेडला सकाळी 07.28 वाजता माहिती मिळाली. माहिती मिळताच रुग्णवाहिकेसह अग्निशमन दलाच्या 15 गाड्या घटनास्थळी दाखल झाल्या आणि आग विझवण्याचे काम सुरू केले.

आग लागली तेव्हा फ्लॅटमध्ये पाच जण होते. चौघे बाहेर पडण्यात यशस्वी झाले, तर 15 वर्षीय प्रांजल खोलीत अडकली, नंतर बाल्कनीकडे गेली आणि जीव वाचवण्याची विनंती करू लागली. सकाळी आठच्या सुमारास बचावकार्य सुरू झाले. अग्निशमन दलाचे एक पथक 8 व्या मजल्यावर पोहोचले. तिथून दोरी बांधून दोन जण त्या बाल्कनीत पोहोचले. त्याने मुलीला बाहेर काढले. यानंतर त्यांना सिव्हिल हॉस्पिटलमध्ये नेण्यात आले. डॉक्टरांच्या म्हणण्यानुसार प्रांजल 100 टक्के भाजली होती. यामुळे तिचा मृत्यू झाला.