Andhra Pradesh Accident: आंध्र प्रदेशातील बापटला जिल्ह्यात रविवारी पहाटे झालेल्या भीषण रस्ता अपघातात तीन महिला आणि एका 9 वर्षीय मुलीसह पाच जणांचा मृत्यू झाला.

हे सर्व लोक गुंटूरला जात असताना बापटला जिल्ह्यातील मेदारमेटलाजवळ महामार्गावरील दुभाजकाला धडकल्यानंतर त्यांची कार उलटली आणि त्यानंतर एका ट्रकने या कारला धडक दिली.

पोलिसांनी दिलेल्या माहितीनुसार, ही कार ओंगोलहून गुंटूरच्या दिशेने जात होती. त्यानंतर वाटेत चालकाचा वाहनावरील ताबा सुटून ते डिव्हायडरला धडकले.

यामुळे कार पलटी होऊन रस्त्याच्या दुसऱ्या बाजूला पडली. यावेळी विरुद्ध दिशेने येणाऱ्या ट्रकने कारला धडक दिली.

चिन्नागंजममधील तिरुनाला येथे ड्युटीवर जात असताना, एसआय वाली यांनी पत्नी, मुलगी आणि शेजारच्या कुटुंबातील दोन महिलांना सोबत घेतले होते.

एका शिवमंदिराला भेट दिल्यानंतर, वाटेत अपघात झाला तेव्हा एसआयने कार चालकाला त्यांना परत अडंकी येथे सोडण्यास सांगितले. पोलिसांनी ही माहिती दिली आहे.

या अपघातात कारमधील पाचही जण जागीच ठार झाले. मृतांमध्ये आडंकी टाउनचे पोलीस उपनिरीक्षक शेख समंदर वाली यांच्या पत्नी आणि मुलीचा समावेश आहे. वहिदा (39), आयशा (09), जी. विजयश्री (50), जी. दिव्या तेजा (27) आणि चालक ब्रह्मचारी असे मृतांची नावे आहेत.

अपघाताची माहिती मिळताच पोलीस तातडीने घटनास्थळी दाखल झाले. या अपघातात पूर्णत: मोडकळीस आलेल्या कारमधून मृतदेह बाहेर काढण्यासाठी पोलिसांना मोठी कसरत करावी लागली.

पोलिसांनी गुन्हा दाखल करून मृतदेह शवविच्छेदनासाठी अडंकी रुग्णालयात पाठवले आहेत. दरम्यान, पाच जणांचा मृत्यू झाल्याच्या वृत्तानंतर अडंकी शहरात शोककळा पसरली आहे.