ED summons Jharkhand CM: झारखंडचे मुख्यमंत्री हेमंत सोरेन यांना सक्तवसुली संचलनालयाने (ईडी) बेकायदा उत्खनन प्रकरणी नोटीस पाठवली आहे. एएनआय या वृत्तसंस्थेच्या माहितीनुसार सोरेन यांना ईडीने गुरूवारी सकाळी 11 वाजता चौकशीसाठी हजर राहण्यास सांगितले आहे.

यापुर्वी ईडीने रांची येथील विशेष न्यायालयात हेमंत सोरेन, बच्चू यादव आणि प्रेम प्रकाश यांचे निकटवर्तीय पंकज मिश्रा यांच्याविरोधात पीएमएलए नुसार बेकायदा उत्खनन प्रकरणी आरोपपत्र दाखल केले होते. मिश्रा यांच्यावर झारखंड आणि बिहारमध्ये खंडणी वसुलीचाही आरोप आहे.

सोरने यांना ईडीने नोटीस पाठविल्याने झारखंडमध्ये राजकारण तापले आहे. विरोधकांकडून केंद्र सरकारवर सातत्याने तपास यंत्रणांचा दुरूपयोग केल्याचा आरोप केला जात आहे. तथापि, ईडीने या प्रकणात यापुर्वी 47 ठिकाणी छापे टाकले होते.

यावर्षीच मे महिन्यात तत्कालीन आयएएस अधिकारी आणि आता निलंबित केलेल्या झारखंडच्या माजी उत्खनन सचिव पूजा सिंघल यांना ईडीने अटक केली होती. सिंघल यांच्याशी कथितरित्या संबंधित मनरेगा निधी घोटाळ्यात 5000 पानांचे आरोपपत्र दाखल करण्यात आले होते. ईडीने या प्रकरणात झारखंड मुक्ति मोर्चाचे (झामुमो) माजी खजानिस रवी केजरीवाल यांचीही चौकशी केली होती.