K. Kavitha ED enquiry: दिल्ली मद्य धोरण प्रकरणाची धग आता दक्षिणेतही पोहचली आहे. या प्रकरणात सक्तवसुली संचालनालय (ईडी) तेलंगणाचे मुख्यमंत्री के. चंद्रशेखर राव (केसीआर) यांच्या आमदार मुलीची चौकशी करणार आहे.

राव यांची कन्या के. कविता या भारत राष्ट्र समितीच्या तेलंगणा विधान परिषदेतील आमदार आहेत. दरम्यान, ईडीच्या समन्सनंतर कविता या दिल्लीत पोहचल्या आहेत.

दिल्ली उत्पादन शुल्क धोरणाशी संबंधित प्रकरणातील के. कविता यांच्या कथित भूमिकेबाबत त्यांची चौकशी केली जात आहे. या प्रकरणाशी संबंधित हेराफेरीमध्ये कविता यांचा थेट संबंध असल्याचे ईडीच्या सूत्रांचे म्हणणे आहे.

मीडिया रिपोर्ट्सनुसार, या संदर्भात ईडीने के. कविता यांच्या हैदराबादस्थित कथितरित्या त्यांच्या जवळचे व्यावसायिक अरुण रामचंद्रन पिल्लई यांचीही चौकशी करू शकते. पिल्लई यांना आठवडाभरापूर्वी ईडीने अटक केली होती.

संसदेच्या अर्थसंकल्पीय अधिवेशनाच्या दुसऱ्या टप्प्यात महिला आरक्षण विधेयक मंजूर करण्याच्या मागणीसाठी के. कविता यांनी शुक्रवारी दिल्लीतील जंतरमंतरवर उपोषण केले होते.

सीपीआय (एम)चे सरचिटणीस सीताराम येचुरी यांच्या उपस्थितीत दिल्लीच्या जंतरमंतरवर झालेल्या सहा तासांच्या उपोषणाला विरोधी पक्षांनीही पाठिंबा दिला होता. कविता यांनी राष्ट्रपती द्रौपदी मुर्मू यांनीही या विषयात रस दाखवून महिलांच्या पाठीशी उभे राहण्याचे आवाहन केले.