Bangladesh High Commission Protest : बांगलादेशातील मैमनसिंह शहरात एका हिंदू तरुणाची जमावाकडून निर्घृण हत्या करण्यात आल्याच्या घटनेने संपूर्ण भारतात संतापाची लाट उसळली. या घटनेचा निषेध करण्यासाठी आज (23 डिसेंबर) राजधानी दिल्लीतील बांगलादेश हाय कमिशनबाहेर विराट निदर्शने करण्यात आली. विश्व हिंदू परिषद (विहिंप) आणि विविध हिंदू संघटनांच्या कार्यकर्त्यांनी रस्त्यावर उतरुन बांगलादेश सरकार आणि तेथील कट्टरपंथी शक्तींविरुद्ध जोरदार घोषणाबाजी केली.

बॅरिकेड्स तोडण्याचा प्रयत्न आणि पोलिसांशी झडप

आंदोलनाचा वाढता जोर लक्षात घेता दिल्ली (Delhi) पोलिसांनी हाय कमिशनबाहेर कडेकोट सुरक्षा व्यवस्था तैनात केली होती. मात्र, संतप्त आंदोलकांनी सुरक्षेसाठी लावलेले बॅरिकेड्स तोडून पुढे जाण्याचा प्रयत्न केला. यावेळी पोलीस आणि आंदोलकांमध्ये मोठी झडप झाली. परिस्थिती हाताबाहेर जाऊ नये म्हणून पोलिसांनी अनेक आंदोलकांना ताब्यात घेतले. हातात निषेधाचे फलक घेतलेले तरुण बांगलादेशातील हिंदूंच्या संरक्षणाची मागणी करत होते. आंदोलनादरम्यान काही कार्यकर्त्यांनी बॅरिकेड्सवर चढून 'हनुमान चालीसा'चे पठण करत आपला निषेध नोंदवला, ज्याने सर्वांचे लक्ष वेधून घेतले.

बांगलादेशातील ती अंगावर काटा आणणारी घटना

बांगलादेशात (Bangladesh) सध्या सुरु असलेल्या अस्थिरतेच्या पार्श्वभूमीवर दीपू चंद्र दास (वय 25) या हिंदू युवकाची ईशनिंदेच्या खोट्या आरोपावरुन जमावाने हत्या केली. दीपू हा मैमनसिंह येथील एका कारखान्यात काम करत होता. कट्टरपंथीयांच्या जमावाने कारखान्याला घेराव घालून दीपूला बाहेर ओढले आणि त्याचा जीव जाईपर्यंत त्याला मारहाण केली. एवढ्यावरच न थांबता नराधम जमावाने त्याचा मृतदेह झाडाला लटकवून पेटवून दिला. या अमानवीय घटनेचे व्हिडिओ सोशल मीडियावर व्हायरल झाल्यानंतर जगभरातील हिंदू समुदायामध्ये तीव्र संताप व्यक्त होत आहे.

देशभरात आंदोलनाचे लोन

केवळ दिल्लीतच नव्हे, तर भोपाळ, कोलकाता आणि मुंबईसह देशातील अनेक मोठ्या शहरांमध्ये या घटनेचे पडसाद उमटत आहेत. बांगलादेशातील हिंदू अल्पसंख्याकांवर होणारे अत्याचार थांबवावेत आणि दोषींना कठोर शिक्षा व्हावी, अशी मागणी जोर धरत आहे. आंतरराष्ट्रीय समुदायाने या मानवी हक्कांच्या उल्लंघनाकडे लक्ष द्यावे, असे आवाहन हिंदू संघटनांनी केले आहे. सुरक्षा यंत्रणा सध्या हाय कमिशन परिसरावर ड्रोनद्वारे नजर ठेवून आहेत.