पंजाबी गायक आणि काँग्रेस नेते सिद्धू मुसेवाला यांच्या हत्या प्रकरणात दिल्ली पोलिसांच्या स्पेशल सेलला मोठे यश मिळाले आहे. पोलिसांनी शूटर्सच्या मॉड्यूल प्रमुखासह दोन मुख्य शूटर्संना अटक केली आहे. त्यांच्याकडून पोलिसांनी मोठ्या प्रमाणात शस्त्रे आणि स्फोटके जप्त केली आहेत. (Delhi Police Special has arrested two shooters in connection with the murder of Sidhu Moose Wala)

मिळालेल्या माहितीनुसार, अटक करण्यात आलेले दोन्ही आरोपी तेच शूटर आहेत, ज्यांनी मुसेवाला यांच्यावर गोळ्या झाडल्या होत्या. ते लॉरेन्स बिश्नोई टोळीशी संबंधित असून त्यांचा गुन्हेगारी इतिहास असल्याचे सांगण्यात येत आहे.

दरम्यान, पंजाबी गायक सिद्धू मुसेवाला (Sidhu Moose Wala) यांची पंजाबच्या मानसा जिल्ह्यात 29 मे रोजी अज्ञात हल्लेखोरांनी गोळ्या झाडून हत्या केली होती, ज्यांचा लॉरेन्स बिश्नोई (Lawrence Bishnoi) टोळीशी संबंध असल्याचा आरोप आहे. मुसेवाला हत्याकांडातील मुख्य आरोपी गँगस्टर लॉरेन्स बिश्नोई सध्या पंजाब पोलिसांच्या ताब्यात आहे. 14 जून रोजी पंजाब पोलिसांनी (Police) लॉरेन्सला अटक केली आणि त्याला एक दिवसाच्या ट्रान्झिट रिमांडवर पंजाबला (Punjab) नेले.

पंजाब पोलिसांनी दिल्लीच्या (Delhi) पटियाला हाऊस न्यायालयात युक्तिवाद केला होता की, आमच्या तपासादरम्यान असे आढळून आले आहे की, सिद्धू मुसेवाला हत्या प्रकरणातील लॉरेन्स बिश्नोई हा मुख्य सूत्रधार आहे. त्यामुळे त्याची कोठडीत चौकशी करणे आवश्यक आहे.