भारतीय किसान युनियनचे नेते आणि शेतकरी आंदोलनातील प्रमुख चेहरा असलेल्या राकेश टिकैत यांना अटक झाल्याचे वृत्त चुकीचे असल्याची माहीती दिल्ली पोलिसांनी शनिवारी दिली. तसेच अशा पद्धतीने फेक न्यूज पसरवणाऱ्यांवर कारवाई करण्यात येणार असल्याचे देखील पोलिसांनी सांगितले.

राकेश टिकैत यांच्या अटकेबद्दल वृत्त निराधार असून अशा पद्धतीची चुकीची माहीती पसरवणाऱ्या बातम्या आणि ट्विट विरोधात कारवाई केली जाणार असल्याचे पोलीस उपायुक्त प्रियांका कश्यप यांनी सांगितले. “टिकैत यांना अटक झाली नसून ते गाझीपूर य़ेथील आंदोलन स्थळीच आहेत. तसेच त्याठिकाणी कुठलीही कारवाई झाली नाही” असे भारतीय किसान युनियनचे प्रवक्ते धर्मेंद्र मलिक यांनी सांगितले.

दरम्यान, शेतकरी आंदोलनाला 7 महिनेपुर्ण झाले, मात्र अजुनही शतकऱ्यांच्या मागण्या मान्य झालेल्या नाहीत. शेतकरी आणि केंद्र सरकार यांच्याच चर्चेच्या अनेक फेऱ्या झाल्या तरीही शेतकऱ्यांच्या मागण्या पुर्ण झाल्या नाही. त्यामुळे आंदोलक शेतकऱयांनी वेगवेगळ्या राज्यांत असणाऱ्या राजभवनांना घेराव घालुन राज्यपालांना निवेदन देणार असल्याची घोषणा केल्यानंतर दिल्ली पोलीसांनी शनिवारी दिल्लीच्या सीमावर्ती भागातील सुरक्षाव्यवस्था वाढवली आहे.