Shocking News: उत्तराखंडमधील रुरकी गावात एका वृद्ध महिलेचा मृत्यू झाला होता, तिच्या अंत्यसंस्काराची तयारी सुरू होती. अंत्यसंस्कारासाठी सर्व नातेवाईकही पोहोचले. मात्र अचानक मृत महिलेच्या शरीरातील हालचाल पाहून सगळेच अवाक् झाले. या महिलेने तब्बल सात तासानंतर डोळे उघडले आणि सर्वानाच धक्का बसला. या महिलेचे वय 102 वर्षे आहे.

या प्रकाराने उपस्थित नातेवाईक, गावकऱ्यांचा कोणाचाही स्वतःच्या डोळ्यांवर विश्वास बसत नव्हता, पण मृत वृद्ध महिलेने डोळे उघडल्यानंतर उपस्थित सर्वांच्याच आनंदाला पारावार उरला नाही.

ही घटना उत्तराखंडच्या मंगलोर भागातील आहे. मंगळूर भागातील नरसन खुर्द येथील रहिवासी असलेल्या विनोद यांची १०२ वर्षे वय असलेली आई ज्ञानदेवी काही दिवसांपासून आजारी होती. अचानक ती बेशुद्ध पडली, त्यानंतर नातेवाईकांनी डॉक्टरांना बोलावले. तपासणीनंतर डॉक्टरांनी त्यांना मृत घोषित केले. यामुळे कुटुंबात शोककळा पसरली.

कुटूंबीयांनी त्यांच्या मृत्यूची माहिती सर्व नातेवाईकांना दिली, त्यानंतर सर्व नातेवाईक आणि ग्रामस्थ त्यांच्या घरी जमा झाले. अंतिम संस्काराची सर्व तयारी पूर्ण झाली होती. अंत्यसंस्कारासाठी मृतदेह नेणार असतानाच अचानक ज्ञानदेवी यांच्या शरीरात काही हालचाल जाणवली.

त्यानंतर काही वेळातच ज्ञानदेवींनी डोळे उघडले. घरातल्यांनी त्यांना काही खायला हवे काय, असे विचारले असता या महिलेने चाट खायची इच्छा व्यक्त केली. त्यामुळे नातेवाईकांनी लगेचच गावातून त्यांच्यासाठी चाट आणले. ते खाल्ल्यानंतर ज्ञानदेवी अगदी पुर्वीप्रमाणे सर्वसामान्यांप्रमाणे बोलू लागल्या.

महिलेच्या नातवाने सांगितले की, त्यांची आजी सुमारे सात तास मृत पडून होती. त्यानंतर तीने अचानक श्वास घेण्यास सुरुवात केली आणि अंत्यसंस्काराची तयारी झालेल्या घरात आनंदाचे वातावरण पसरले. विनोद यांच्या माहितीनुसार त्यांची आई संपूर्ण गावातील सर्वात वृद्ध महिला आहे.