ByPoll: देशातील 6 राज्यातील विधानसभेच्या 7 जागांसाठी झालेल्या पोटनिवडणुकांत भाजपने 4 जागांवर विजय मिळवला आहे. यात उत्तरप्रदेशातील गोकर्णनाथ, बिहारमधील गोपालगंज, ओडिशातील धामनगर आणि हरियाणातील आदमपूर या जागांचा समावेश आहे.

बिहारमधील मोकामा येथील पोटनिवडणुकीत राष्ट्रीय जनता दलाच्या नीलम देवी यांनी विजय मिळवला. त्या बाहुबली नेता अनंत सिंह यांच्या पत्नी आहेत. तेलंगणात तेलंगणा राष्ट्र समिती आणि महाराष्ट्रात उद्धव ठाकरे यांच्या पक्षाच्या उमेदवाराने विजय मिळवला आहे. या सर्व जागांवर 3 नोव्हेंबर रोजी मतदान झाले होते.

या सर्व मतदारसंघात मिळून सर्वाधिक 75.25 टक्के मतदान हरियाणातील आदमपूर येथे झाले. तर महाराष्ट्रातील अंधेरी येथे सर्वात कमी 31.74 टक्के मतदान झाले.

उत्तरप्रदेशच्या लखीमपुरी खिरी येथील गोला गोकर्णनाथ जागेवर भाजपच्या अमन गिरी यांनी सपाचे उमेदवार विनय तिवारी यांना 34 हजार 298 मतांनी पराभूत केले. हरियाणातील हिसार जिल्ह्यातील आदमपूरय येथे भाजप उमेदवार भव्य बिष्णोई यांनी 16 हजार 606 मतांनी विजय मिळवला.

बिहारमध्ये एक जागा राजदला तर एक जागा भाजपला मिळाली. मोकामा येथे राजदच्या नीलम देवी यांनी भाजपच्या सोनम देवी यांना 16 हजार 707 मतांनी पराभूत केले. तर गोपालगंज येथे भाजपच्या कुसुमदेवी यांनी राजदच्या मोहन गुप्ता यांच्यावर अखेरच्या फेरीत 2183 मतांनी विजय मिळवला.

महाराष्ट्रातील अंधेरीत शिवसेना उद्धव गटाच्या ऋतुजा लटके यांनी विजय मिळवला. तेलंगणात मुनुगोडे येथे कुसुकुंतला प्रभाकर रेड्डी यांनी विजय मिळवला. तर ओडिशातील धामनगर येथे भाजपच्या सूर्यवंशी सूरज यांनी बिजू जनता दलाच्या अबंती दास यांना पराभूत केले. सूरज यांचे वडील आमदार बिष्णु चरण सेठी यांच्या निधनामुळे ही जागा रिक्त झाली होती.