BJP Manifesto News :

नवी दिल्ली, केंद्रात तिसऱ्यांदा सत्तेत आल्यास समान नागरी कायदा लागू करण्याचे आणि ‘एक देश, एक निवडणूक’ प्रणाली अंमलात आणण्याचे आश्‍वासन भाजपने आज देशवासीयांना दिले.

देशातील प्रमुख चार वर्गांना केंद्रस्थानी ठेवून पंतप्रधान नरेंद्र मोदी यांनी भाजपच्या जाहीरनाम्याचे, ज्याला त्यांनी ‘संकल्पपत्र’ म्हटले आहे, प्रकाशन केले. विकास आणि परंपरा या दोन्ही बाबींवर विश्‍वास ठेवून भारताला आर्थिक उन्नतीच्या मार्गावर नेऊ, असा विश्‍वास मोदींनी यावेळी व्यक्त केला.

लोकसभा निवडणुकीच्या पहिल्या टप्प्यातील मतदानाला पाच दिवसांचा कालावधी उरला आहे. इतर महत्त्वाच्या पक्षांचे जाहीरनामे प्रसिद्ध झाले असल्याने भाजपच्या जाहीरनाम्याकडे सर्वांचे लक्ष लागले होते.

दीनदयाळ मार्गावरील भाजपच्या मुख्यालयात पंतप्रधान मोदी यांच्या हस्ते आज ‘संकल्पपत्रा’चे प्रकाशन करण्यात आले. यावेळी जाहीरनामा समितीचे अध्यक्ष व संरक्षणमंत्री राजनाथ सिंह, अर्थमंत्री निर्मला सीतारामन तसेच पक्षाचे राष्ट्रीय अध्यक्ष जे. पी. नड्डा उपस्थित होते.

‘मोदींची गॅरंटी २०२४’

गरीब, युवक, अन्नदाता आणि नारीशक्ती या घटकांना केंद्रीभूत ठेवून भाजपने जाहीरनामा तयार केला आहे. ‘मोदींची गॅरंटी २०२४’ असे शीर्षक दिले आहे. सध्या राबविल्या जात असलेल्या विविध योजना पुढील काळातही राबविण्यात येतील, असे पंतप्रधान मोदी यांनी भाषणात सांगितले.

सध्या जगात अनिश्चिततेचे वातावरण आहे. अस्थिर देशांत राहणाऱ्या भारतीयांची सुरक्षा आमची प्राथमिकता आहे. अशावेळी ठोस निर्णय घेण्यासाठी मजबूत आणि स्थिर सरकार केंद्रात असणे आवश्यक आहे. एक असे सरकार असणे गरजेचे आहे की जे देशाला आर्थिक रूपाने समृद्ध बनवेल.

- नरेंद्र मोदी, पंतप्रधान.

हे जुमलापत्र आहे. भाजपच्या जाहीरनाम्यात महागाई आणि बेरोजगारी हे शब्दच नाहीत. लोकांच्या जीवनाशी संबंधित महत्त्वाच्या मुद्द्यांवर चर्चा करण्यास भाजप तयार नाही, हेच यातून सिद्ध होते.

- राहुल गांधी, काँग्रेसचे नेते