Ram Mandir: अयोध्येतील राम मंदिरातील मुख्य पुजाऱ्यांच्या विनंतीवरुन रामलल्लाला आता दुपारी एक तासाची विश्रांती दिली जाणार आहे. रामलल्लाला शुक्रवारपासून एक तासाची विश्रांती देण्यात येत आहे. याआधी रामलल्लाला दुपारी आराम मिळत नव्हता.

राम मंदिराच्या (Ram Mandir) पुजाऱ्याचा असा युक्तिवाद आहे की, प्रभू राम हे लल्ला आहे, म्हणजेच एक बालक. त्यांच्यावर जास्त जोर दिला जाऊ शकत नाही. राम मंदिरातील प्राणप्रतिष्ठा सोहळ्यानंतर भाविकांची वाढती गर्दी पाहता मंदिर ट्रस्टने दर्शनाची वेळ सकाळी 6 ते रात्री 10 अशी वाढवली आहे. 23 जानेवारीपासून भगवान रामाला विधीसाठी पहाटे 4 वाजता उठवले जायचे, ज्याला तब्बल दोन तास लागायचे. त्यानंतर सकाळी 6 वाजल्यापासून दर्शन सुरु होऊन रात्री 10 वाजेपर्यंत चालते. यानंतर, संध्याकाळच्या विधीला देखील दोन तास लागतात.

आचार्य सत्येंद्र दास म्हणाले की, “रामलल्ला हे पाच वर्षांचे मूल आहे आणि ते 18 तास सतत इतका ताण घेऊ शकत नाहीत. त्यामुळे बालदेवतेला थोडी विश्रांती देण्यासाठी हा निर्णय घेण्यात आला आहे. मंदिराचे दरवाजे दुपारी 12:30 ते 1:30 पर्यंत बंद राहतील, जेणेकरुन रामलल्ला थोडी विश्रांती घेऊ शकतील.''

दुसरीकडे, प्राणप्रतिष्ठा सोहळ्यापूर्वी दर्शनाची वेळ सकाळी 7 ते सायंकाळी 6 अशी होती. ज्यात दुपारी दीड ते साडेतीन या दोन तासांच्या विश्रांतीचाही समावेश होता. अयोध्येतील (Ayodhya) राम मंदिराचे उद्घाटन 22 जानेवारी रोजी पंतप्रधान नरेंद्र मोदी यांच्या नेतृत्वाखाली एका समारंभात झाले. या शुभ सोहळ्यात राजकारणी, क्रिकेटपटू, उद्योगपती, अध्यात्मिक नेते आदींसह हजारो व्हीव्हीआयपी सहभागी झाले होते.

23 जानेवारी रोजी मंदिर रामभक्तांसाठी दर्शनासाठी खुले करण्यात आले. मंदिराच्या उद्घाटनापासून, दहा लाखांहून अधिक भाविक आणि यात्रेकरुंनी प्रार्थना करण्यासाठी आणि प्रभू रामलल्लांचे आशीर्वाद घेण्यासाठी पवित्र स्थळाला भेट दिली आहे.