Kejriwal On Currency Note: दिल्लीचे मुख्यमंत्री आणि आम आदमी पक्षाचे राष्ट्रीय संयोजक अरविंद केजरीवाल यांनी भारतीय चलनी नोटांवर श्री लक्ष्मी आणि गणपतीचे फोटो छापावेत, अशी मागणी केली आहे. पत्रकार परिषदेतून त्यांनी केंद्र सरकारकडे ही मागणी केली आहे.

केजरीवाल म्हणाले की, दिवाळीत लक्ष्मीपुजनावेळी माझ्या मनात या भावना आल्या. त्यामुळे त्या भावना तत्काळ १३६ कोटी देशवासी आणि सरकारपर्यंत पोहचवत आहे. देशाची अर्थव्यवस्था कमकुवत होत चालली आहे. आपण आजही विकसनशील आहोत. गरीब आहोत. आपल्या सर्वांनाच वाटते की, भारत श्रीमंत व्हावा. प्रत्येक भारतवासी श्रीमंत झाला पाहिजे. त्यासाठी खूप प्रयत्नांची गरज आहे. शाळा, रूग्णालये, पायाभूत सुविधांची गरज आहे. प्रयत्न करत आहोत, पण त्याचे परिणाम दिसत नाहीत. देवदेवतांचा आशिर्वाद लाभला तर सकारात्मक परिणाम दिसतील.

केजरीवाल म्हणाले की, दिवाळीत सर्वांनीच लक्ष्मी, गणेश पुजन केले असेल. उद्योगपती तर कार्यालयातच लक्ष्मी, गणेशाची मुर्ती ठेवतात. त्यामुळे माझे सरकारला आवाहन आहे की, भारतीय नोटांवर लक्ष्मी आणि गणपतीचा फोटा छापावा. नोटांवरील महात्मा गांधीजींचा फोटो तसाच राहू द्यावा. पण दुसऱ्या बाजूला या देवतांचे फोटो छापावेत. जेणेकरून अर्थव्यवस्थेला या देवतांचा आशिर्वाद मिळेल.

केजरीवाल म्हणाले, गणपती विघ्नहर्ता आहे. त्याचा आशिर्वाद मिळाला तर अर्थव्यवस्था सुधारेल. जुन्या नोटा आहे तशाच राहाव्यता, नव्या छापल्या जाणाऱ्या नोटांवर लक्ष्मी, गणेशाचे फोटो लावावेत. इंडोनेशियात २० हजार रूपयांच्या नोटांवर गणपतीचा फोटो आहे. मग भारतात असे का घडू शकत नाही? असा सवालही त्यांनी केला.

भाजपचा पलटवार

केजरीवालांच्या या मागणीवर भाजपचे प्रवक्ता संबित पात्रा म्हणाले की, केजरीवाल हे तेच व्यक्ती आहेत ज्यांनी राम मंदिरात जाण्यास नकार दिला होता. आणि त्याचे कारण सांगताना ते म्हणाले होते की, देव तिथे केलेली प्रार्थना स्विकारणार नाही. याच माणसाने काश्मिरी पंडितांचे विस्थापन हे खोटे असल्याचे सांगत खिल्ली उडवली होती. त्यामुळे त्यांच्या मागणीला महत्व देण्चाची गरज नाही.