उत्तर प्रदेश विधानसभा निवडणुकीची (UP Assembly Election) महाअंतिम फेरी वाराणसीमध्ये (Varanasi) होणार असून, सातव्या आणि शेवटच्या टप्प्यातील मतदान पूर्वांचलच्या सात जिल्ह्यांमध्ये 7 मार्चला होणार आहे. त्यासाठी सर्वच पक्षांच्या दिग्गजांनी ताकद पणाला लावली आहे. सर्वच पक्षांच्या दिग्गजांनी वाराणसीला केंद्रस्थानी ठेवले आहे. आज रिंगरोडच्या बाजूला असलेल्या ऐधे गावात सपा आघाडीच्या मेळाव्यात अखिलेश यादव (Akhilesh Yadav), ममता बॅनर्जी (Mamata Banerjee) यांच्यासह अनेक नेत्यांनी जल्लोष केला.

पश्चिम बंगालच्या मुख्यमंत्री ममता बॅनर्जी म्हणाल्या की, यूपीमध्ये खेला होबे होणार. त्यांनी मंचावरून सपाच्या (Samajwadi Party) विजयाच्या आणि भाजपला हटविण्याच्या घोषणा दिल्या. 'मी बनारस विमानतळावरून घाटात जात असताना भाजपच्या गुंडांनी माझी गाडी अडवली. त्यांनी माझ्या गाडीवर लाठ्या मारल्या आणि येथून परत जा असे सांगितले. तेव्हा मला समजले की भाजप यूपीमध्ये किती हताश आणि निराश आहे. पश्चिम बंगालमध्ये भाजपचा पराभव झाला आहे, यूपीमध्येही भाजपला पराभव पत्करावा लागणार,' असा दावा ममता बॅनर्जी यांनी आज केला.

'सातव्या टप्प्यात भाजपची सफाई होणार, ममता बॅनर्जी येथे आल्याबरोबर भाजपचा पराभव होणार नाही. आज सहाव्या टप्प्यातील मतदान आहे. सातव्या टप्प्यातील मतदान झाल्यावर भाजपचा पराभवच होणार आहे. पूर्वांचलची जनता भाजपला माफ करणार नाही तर साफ करणार आहे. लोकांनी सपाचे सरकार स्थापन करण्याचा निर्णय घेतल्याचा,' दावा अखिलेश यांनी केला आहे.

पंतप्रधान नरेंद्र मोदी यांचा लोकसभा मतदारसंघ वाराणसीमध्ये विरोधी पक्षांनी आपली पूर्ण ताकद लावली आहे. येथे 7 मार्च रोजी मतदान होत आहे. 5 मार्च रोजी सायंकाळी येथे प्रचाराची सांगता होणार आहे. दुसरीकडे, प्रियांका गांधी रामनगर आणि रोहनियामध्ये जाहीर सभा आणि घरोघरी प्रचार करणार आहेत. त्याचवेळी पंतप्रधान नरेंद्र मोदी उद्या वाराणसीत रोड शो करणार आहेत. प्रियांका आणि राहुल गांधी यांची जाहीर सभाही प्रस्तावित आहे.