'जेव्हा भाजप चहावाल्याच्या मुलाला पंतप्रधान बनवू शकते...': संजय निषाद

उत्तर प्रदेश विधानसभा निवडणुकीच्या (Uttar Pradesh Assembly Elections) सहाव्या टप्प्यासाठी आज मतदान होत आहे. या निवडणुकीत भाजप आणि त्यांच्या आघाडीच्या पक्षांनी प्रचंड बहुमताने विजयाचा विश्वास व्यक्त केला आहे. या निवडणुकीत निषाद पक्षाचे संस्थापक संजय निषाद हे भाजपसोबत (BJP) युती करुन निवडणूकीच्या रिंगणात आहेत. (Sanjay Nishad Said BJP Can Make Chahawala Son Prime Minister Of India)

दरम्यान, यूपी निवडणुकीबाबत ते म्हणाले की, यावेळी आम्ही 300 हून अधिक जागा जिंकू. उत्तर प्रदेशात (Uttar Pradesh) भाजपची सत्ता आल्यास मंत्रिपद मिळण्याची शक्यता काय, असे विचारले असता संजय निषाद म्हणाले की, भाजप जेव्हा एका सामान्य चहावाल्याच्या मुलाला पंतप्रधान बनवू शकते, तर पक्ष निषादच्या मुलाला काहीही बनवू शकते.

तसेच, गोरखपूरमध्ये मतदान केल्यानंतर भाजप खासदार आणि माजी केंद्रीय मंत्री शिवप्रताप शुक्ला (Shivpratap Shukla) यांनीही या निवडणुकीत भाजप 300 हून अधिक जागा जिंकेल असा दावा केला. बलियामधून निवडणूक लढवणारे उत्तर प्रदेश मंत्री आनंद स्वरुप शुक्ला (Anand Swarup Shukla) म्हणाले की, 'राज्यात भाजप आणि योगी आदित्यनाथ (Yogi Adityanath) यांची लाट आहे. आम्ही 350 पेक्षा जास्त जागा जिंकू असा विश्वास आहे.'

दुसरीकडे, उत्तर प्रदेशचे मुख्यमंत्री योगी आदित्यनाथ म्हणाले की, पीएम मोदींच्या नेतृत्वाखाली भाजप विक्रम करेल आणि 300 हून अधिक जागा जिंकेल. योगी आदित्यनाथ गोरखपूर शहरी विधानसभा मतदारसंघातून निवडणूक लढवत आहेत.

शिवाय, या टप्प्यात राज्यातील 10 जिल्ह्यांतील 57 विधानसभा जागांवर लोक आपला मतदानाचा हक्क बजावत आहेत. सीएम योगी आदित्यनाथ यांच्यासह अनेक दिग्गज नेत्यांची प्रतिष्ठा पणाला लागल्यामुळे हा टप्पा विशेष मानला जातो. सकाळी 7 वाजता मतदानाला सुरुवात झाली, ते सायंकाळी 6 वाजेपर्यंत सुरु राहणार आहे.