Parliament Budget Session:

संसदेच्या अर्थसंकल्पीय अधिवेशनाचा आज शेवटचा दिवस आहे. 22 जानेवारीला अयोध्येतील ऐतिहासिक राम मंदिराच्या उभारणी आणि रामलल्लाच्या मूर्तीच्या अभिषेकाच्या चर्चेने 17 व्या लोकसभेचे कामकाज संपेल. या मुद्द्यांवर राज्यसभेतही चर्चा होणार आहे. भाजपने शुक्रवारी व्हीप जारी करुन आपल्या खासदारांना शनिवारी दोन्ही सभागृहात उपस्थित राहण्याचे निर्देश दिले. अयोध्येतील रामलल्लाच्या मूर्तीला अभिषेक केल्याबद्दल पंतप्रधान नरेंद्र मोदींचे आभार मानणारा ठराव संसद पारित करणार असल्याचे सूत्रांनी सांगितले.

मिळालेल्या माहितीनुसार, ठरावाव्यतिरिक्त, मोदी सरकारने अमृत कालमध्ये विकसित भारतासाठी केलेली प्रतिज्ञा आणि रामराज्यासारखे सुशासन प्रस्थापित करण्याच्या संकल्पावरही चर्चा केली जाईल. आम्हाला कोणत्या प्रकारचा देश बनवायचा आहे आणि कोणत्या प्रकारचे नेतृत्व आपल्याकडे असले पाहिजे यावर सरकार चर्चा करु शकते. अधिवेशन संपण्यापूर्वी पंतप्रधान लोकसभेत बोलू शकतात. शनिवारच्या लोकसभेच्या कामकाजाच्या यादीनुसार, माजी केंद्रीय मंत्री सत्यपाल सिंह, बागपतचे भाजप खासदार आणि कल्याणचे शिवसेनेचे खासदार श्रीकांत एकनाथ शिंदे नियम 193 अंतर्गत चर्चा करणार आहेत.

दुसरीकडे, या आठवड्याच्या सुरुवातीला देशाचे नाव बदलून 'भारत' करण्याची मागणी करत सत्यपाल सिंह यांनी लोकसभेत सांगितले होते की, मोदी "रामराज्य स्थापनेसाठी" काम करत आहेत. ते पुढे म्हणाले होते की, “रामराज्य स्थापन होईपर्यंत आम्ही शांत बसणार नाही. स्वातंत्र्यलढ्याच्या काळात महात्मा गांधींनी (Mahatma Gandhi) रामराज्य स्थापन करण्याबाबत सांगितले होते. पंतप्रधान मोदी महात्मा गांधी, महर्षी दयानंद आणि दीनदयाळ उपाध्याय यांच्या आदर्शांचे अनुसरण करत आहेत आणि देशात रामराज्य स्थापन करण्यासाठी प्रयत्नशील आहेत."

दरम्यान, 25 जानेवारी रोजी अयोध्या मंदिर समारंभानंतर प्रथमच केंद्रीय मंत्रिमंडळाची बैठक झाली, ज्यामध्ये अभिषेक सोहळ्यासाठी मोदींचे अभिनंदन करणारा ठराव मंजूर करण्यात आला. संरक्षण मंत्री राजनाथ सिंह (Rajnath Singh) यांनी हा प्रस्ताव मांडला. मंत्रिमंडळाची ही बैठक ऐतिहासिक ठरली.