उत्तर प्रदेश: हाताला काम नसताना अचानक तुमच्या खात्यात कोट्यवधी रुपये जमा झाले तर? सहाजिकच कोणालाही आनंदच होईल. डिजिटल युगात फसवेगिरीला ऊत आले आहेच पण काही चमत्कारीक घटना देखील उघडकीस येतायेत.

दनकौरमध्ये २० वर्षीय युवकाच्या बँक खात्यात तब्बल ११ लाख कोटी रुपये जमा झाले. १४ अंकी आकडा पाहून बेरोजगार युवकाचा आनंद गगनात मावेनासा झाला पण, थोड्याच वेळात त्याचा भ्रमनिरासही झाला.

दनकौर येथील दिलीप या २० वर्षीय युवकाच्या बँक खात्यात ११.१३ लाख कोटी रुपये जमा झाले. दिलीपला पैसे जमा झाल्याचा मेसेज मिळताचा त्याचा आनंद गगनात मावेनासा झाला. बेरोजगार असलेला तरुण मेसेज पाहून तत्काळ चौकशीसाठी बँकेत दाखल झाला. चौकशीअंती मात्र त्याचा भ्रमनिरास झाला.

बँकेत चौकशी केली असता बँकेने दिलीपला तांत्रिक अडचणीचे कारण पुढे करत चुकून त्याच्या खात्यात पैसे जमा झाल्याचे सांगितले. नवी युपीआय या मोबाईल अप्लिकेशनमध्ये तांत्रिक अडचण निर्माण झाल्याने हा प्रकार घडल्याचे त्याला सांगण्यात आले. शिवाय त्याच्या खात्यात शून्य शिल्लक असल्याचे देखील स्पष्ट करण्यात आले.

सध्या ही घटना सोशल मिडियावर वाऱ्यासारखी व्हायरल झाली असून, नेटकऱ्यांनी यावर खुमासदार चर्चा सुरु केली आहे. दिलीपने गेल्या दोन महिन्यापूर्वीच एका खासगी बँकेत खाते उघडले होते. दिलीप अनाथ असून, त्याला आई – वडील नाहीयेत, अशी माहिती एक इंग्रजी वृत्तपत्राने प्रसिद्ध केली आहे.