प्रतिष्ठेच्या ‘व्हॅली ऑफ वर्डस्’ पुरस्कारसाठी पुस्तकांच्या नामांकनाची घोषणा झाली असून त्यापैकी भारतीय भाषेमधील पुस्तकांच्या इंग्रजी अनुवादासाठी असलेल्या पुरस्कारासाठीच्या नामांकनाच्या यादीत ज्ञानपिठकार भाई (दामोदर) मावजो यांच्या ‘द वेट’ या गेल्या वर्षी प्रकाशित झालेल्या पुस्तकाचा समावेश करण्यात आला आहे. या विभागामध्ये एकूण ९ पुस्तकांना नामांकन लाभले आहे.

‘द वेट’ या मावजो यांच्या पुस्तकाबरोबरच ‘द ब्लॅक माजिक वूमन (मौशमी कांडाली), द ब्राईड (हरीमोहन झा), इफ देअर इज अ गॉड (प्रभा श्रीदेवन) कालिंदी (श्रीधर केतकर), द ड्रीम ऑफ अ मॅपल गर्ल (डी.एम.झुआरा), बिलोव्हड रोंगोमाला (शहीन अख्तर), टिअर्स ऑफ बेगमस् (ख्वाजा हसन निझामी), व्हॉट द रेनस फोरटोल्ड (एन. मोहनन) या पुस्तकाचा समावेश आहे. 

डेहराडून येथील ‘व्हॅली ऑफ वर्डस्’ आदल्या वर्षीच्या कॅलेडर वर्षात प्रकाशित झालेल्या पुस्तकांना आठ वेगवेगळ्या विभागांत पुरस्कार देते. इंग्रजीत भाषांतरित झालेली देशी भाषेतील पुस्तके हा त्यापैकी एक विभाग आहे.

हिंदी फिक्शन आणि नॉन फिक्शन, भारतीय भाषांमधून झालेली भाषांतरे, इंग्रजी फिक्शन आणि नॉन फिक्शन, युवकांसाठी लिहिले गेलेले साहित्य तसेच बालसाहित्य हे पुस्तक पुरस्कारांसाठीचे विभाग असतात.'व्हॅली ऑफ वर्डस्’ हा त्याच नावाच्या फाऊंडेशन ट्रस्टमार्फत चालवला जाणारा ‘ना नफा’ उपक्रम आहे. जो भारतीय साहित्य आणि कलात्मकतेचा गौरव बिंदू बनला आहे.

यंदा त्यांच्या पुरस्कारांचे हे सातवे वर्ष आहे. राष्ट्रीय स्तरावर त्यांच्याकडून देण्यात येणाऱ्या पुरस्काराबरोबरच ते आयोजित करत असलेला वार्षिक साहित्य आणि कलामहोत्सव लेखक, समीक्षक, अभ्यासक, वाचक कलाकार आणि श्रोत्यांना एकत्रित आणतो.