टाटा समूहाची उप कंपनी टाटा कंझ्युमर प्रॉडक्ट्स लि. बाजारपेठेत आपली पोहोच वाढवण्यासाठी एका मोठ्या योजनेवर काम करत आहे. मुकेश अंबानींच्या (Mukesh Ambani) रिलायन्सला टक्कर देण्यासाठी टाटा कंझ्युमर कंपनी फूड आणि बेवरेज क्षेत्रातील अनेक कंपन्या ताब्यात घेण्याची योजना आखत आहे. या क्षेत्रातील किमान पाच ब्रँड्सबाबत चर्चा सुरु आहे. ब्लूमबर्गने आपल्या एका रिपोर्टमध्ये ही माहिती दिली आहे.

दरम्यान, टाटा कंझ्युमर प्रॉडक्ट्सचे सीईओ सुनील डिसूझा (Sunil D'Souza) यांनी माध्यमाशी बोलताना सांगितले की, कंपनी अशा अनेक संभाव्य कंपन्यांशी चर्चा करत आहे, जिथे त्यांच्या मूल्यांकनात वाढ होण्याची शक्यता आहे.

ते पुढे म्हणाले की 'कंपनी अशा संभाव्य कंपन्यांशी गांभीर्याने चर्चा करत आहे'. मात्र, कोणत्या कंपन्या आपले टार्गेट आहेत याबाबत त्यांनी कोणतेही स्पष्टीकरण दिलेले नाही.

याशिवाय,153 वर्ष जुन्या टाटा समूहाने 2020 मध्ये ग्राहक बाजारपेठेत (Markets) एन्ट्री करत टाटा कंझ्युमर कंपनी सुरु केली. तेव्हापासून कंपनीने NourishCo Beverages Ltd चे अधिग्रहण केले आहे. आणि Soulfull सारख्या कंपन्यांचे अधिग्रहण करुन पोर्टफोलिओचा विस्तार केला आहे.