Reserve Bank Of India: तुमच्या बँकेत लाखो रुपये जमा असले तरी तुम्हाला फक्त 5000 रुपये काढण्याची परवानगी असेल. रिझर्व्ह बँक ऑफ इंडियाच्या (RBI) निर्णयामुळे तामिळनाडूच्या मुसिरी अर्बन को-ऑपरेटिव्ह बँकेच्या ग्राहकांना मोठा धक्का बसला आहे.

खरे तर ढासळत्या आर्थिक स्थितीमुळे रिझर्व्ह बँकेने या सहकारी बँकेवर विविध निर्बंध लादले आहेत. या निर्बंधांमध्ये पैसे काढण्यावर 5,000 रुपयांची मर्यादा घालणे समाविष्ट आहे.

दरम्यान, सहकारी बँकांवरील निर्बंध 3 मार्च रोजी व्यवसाय बंद झाल्यापासून सहा महिन्यांसाठी लागू राहतील आणि ते पुनरावलोकनाच्या अधीन असतील, असे रिझर्व्ह बँकेने एका निवेदनात म्हटले आहे.

निर्बंधांसोबतच, सहकारी बँक, आरबीआयच्या मान्यतेशिवाय, कर्ज (loan) देऊ शकत नाही, कोणतीही गुंतवणूक करु शकत नाही आणि कोणतेही पेमेंट करु शकत नाही. बँक इतर गोष्टींबरोबरच तिच्या कोणत्याही मालमत्तेची विल्हेवाट लावू शकत नाही.

"विशेषतः, सर्व बचत बँक किंवा चालू खात्यांमधून किंवा ठेवीदाराच्या इतर कोणत्याही खात्यातील एकूण शिल्लक रकमेच्या 5,000 रुपयांपेक्षा जास्त पैसे काढण्याची परवानगी दिली जाऊ शकते," असे रिझर्व्ह बँकेने म्हटले आहे. ठेवीदारांना पाच लाख रुपयांपर्यंतचा ठेव विमा मिळण्याचा हक्क असेल.

मात्र, हे निर्देश बँकिंग परवाना रद्द म्हणून घेऊ नयेत, असे रिझर्व्ह बँकेने म्हटले आहे. "बँक (Bank) तिची आर्थिक स्थिती सुधारेपर्यंत निर्बंधांसह बँकिंग व्यवसाय सुरु ठेवेल," असे त्यात म्हटले आहे. ते परिस्थितीनुसार निर्देशांमध्ये बदल करण्याचा विचार करु शकते.