New AC Star Rating in India: सरकारकडून एअर कंडिशनर म्हणजेच एसी साठी नवीन एनर्जी रेटिंग नियम लागू केले जात आहेत. हे नियम 1 जुलै 2022 पासून देशभरात लागू होतील. ब्युरो ऑफ एनर्जी इफिशियन्सी ने 19 एप्रिल 2022 रोजी नवीन बदलांबाबत अधिसूचना जारी केली होती. हे नवीन स्टार रेटिंग नियम 5 स्टार रेटिंग एसी वर लागू होतील. नवीन नियम लागू झाल्यानंतर तुमच्या एसीचे 5 स्टार रेटिंग 4 स्टारवर कमी होईल. आता या सगळ्यात एक प्रश्न पडतो की असे करण्यामागचे कारण काय?

एसी स्टार रेटिंग म्हणजे काय?

AC चे स्टार रेटिंग ऊर्जा कार्यक्षमता म्हणजेच ऊर्जेचा वापर ठरवते. हे ब्युरो ऑफ एनर्जी इफिशियन्सी (BEE) द्वारे जारी केले जाते. स्टार रेटिंगच्या मदतीने, तुमचा एसी किती ऊर्जा वाचवेल हे समजणे सोपे होते. आता तुम्ही जितकी जास्त ऊर्जा वाचवाल तितके वीज बिल कमी होईल. आता बीईईमध्ये काही बदल करण्यात आले आहेत, ज्यामुळे स्टार रेटिंग एका अंकाने कमी करण्यात आले आहे.

एसी स्टार रेटिंगचा ग्राहकांवर काय परिणाम होईल?

नवीन नियम लागू झाल्यानंतर 5 स्टार रेटिंग 4 स्टारवर कमी होईल. विंडो आणि स्प्लिट एसी साठी स्टार रेटिंग सारखे नसेल. नवीन स्टार रेटिंग लागू झाल्यानंतर एसीच्या किमतीत 7 ते 10 टक्क्यांनी वाढ होऊ शकते. याचे कारण नवीन नियमांनंतर एसीचा उत्पादन खर्च वाढणार आहे. अशी बातमी देखील समोर आली आहे की, AC नंतर जानेवारी 2023 मध्ये रेफ्रिजरेटरसाठी नवीन स्टार रेटिंग येईल. एसीच्या स्टार रेटिंगमध्ये पुढील बदल आता 2025 मध्ये होण्याची शक्यता आहे.