Insurance For Mental Health: बदलेली जीवनशैली आणि कामाच्या वाढत्या दबावामुळे लोकांच्या मानसिक आरोग्यावर परिणाम होत आहे. लोक नैराश्य, तणाव यांसारख्या समस्यांचा सामना करत आहेत.

एका अग्रगण्य मानसिक आरोग्य संस्थेच्या मते, गेल्या तीन महिन्यांत नैराश्य आणि चिंतेसाठी समुपदेशन घेणाऱ्यांच्या संख्येत 40 टक्के वाढ झाली आहे.

दरम्यान, विमा नियामकाने जानेवारी 2023 मध्ये विमा कंपन्यांना प्रत्येक पॉलिसीधारकाला मानसिक आजारांसाठी संरक्षण प्रदान करण्याचे आदेश दिले आहेत.

सायरस आणि प्रिया वांद्रेवाला फाऊंडेशन मोफत मानसिक आरोग्य समुपदेशन सेवा पुरवतात. फाऊंडेशनच्या मते, गेल्या 18 महिन्यांत, म्हणजे ऑगस्ट 2021 ते जानेवारी 2023 या कालावधीत समुपदेशनाची मागणी केलेल्यापैकी एक तृतीयांश लोकांना चिंता, नैराश्य, आत्महत्येचे विचार आणि औदासिन्य अशा समस्या जानवत होत्या.

तर गेल्या तीन महिन्यांत म्हणजेच नोव्हेंबर 2022 ते जानेवारी 2023 या काळात या समस्यांची संख्या जवळपास 40 टक्क्यांवर पोहोचली आहे. संपर्क साधलेल्या एक तृतीयांश लोकांनी सांगितले की ते मानसिक आजार, चिंता, नैराश्य आणि आत्महत्येच्या विचारांशी लढत आहेत. अशी माहिती फाऊंडेशनच्या प्रमुख प्रिया हिरानंदानी यांनी एका इंग्रजी वृत्तपत्राला दिली.

दरम्यान, भारतीय विमा नियामक आणि विकास प्राधिकरणाने जानेवारी 2023 पासून पॉलिसीमध्ये मानसिक आरोग्याचा समावेश अनिवार्य केला आहे. त्यामुळे आरोग्य पॉलिसी घेताना मानसिक आरोग्य कव्हरेजकडे लक्ष द्यावे असे आवाहन करण्यात येत आहे.

आयुष्मान भारत पीएम जन आरोग्य योजना (Ayushman Bharat PMJAY) अंतर्गत केंद्र सरकार लोकांना 5 लाख रुपयांपर्यंतच्या उपचारांसाठी विमा संरक्षण देते. मानसिक आरोग्याशी संघर्ष करणाऱ्या रुग्णांना आयुष्मान योजनेद्वारे वैद्यकीय सुविधा पुरविल्या जातात. त्यामुळे आयुष्मान कार्ड बनवणे खूप फायदेशीर ठरू शकते.

उत्तम मानसिक आरोग्यासाठी काही टीप्स

मानसिक आरोग्य समस्या व्यवस्थापन करण्यासाठी किंवा टाळण्यासाठी, नियमित व्यायाम आणि ध्यानधारणा केली पाहिजे.

गॅजेट्सचा अतिवापर टाळणे महत्त्वाचे आहे. किशोरवयीन आणि तरुणांकडे पुरेसे लक्ष दिले पाहिजे.

तणावाचा सामना करण्यासाठी थेरपिस्ट किंवा समुपदेशकासोबत सल्लामसलत करणे महत्वाचे आहे.

सोशल मीडिया, तंत्रज्ञान, ड्रग्ज आणि अल्कोहोल मानसिक आरोग्याच्या समस्या गंभीर करणारे घटक आहेत. हा गोष्टी टाळणे महत्वाचे आहे.