मारुती सुझुकीने जानेवारी महिन्यात ऑटो एक्स्पो 2025 मध्ये त्यांची पहिली इलेक्ट्रिक कार मारुती ईविटारा (Maruti eVitara) प्रदर्शित केली. एका चार्जमध्ये 500 किमी पेक्षा जास्त रेंज देणाऱ्या या कारच्या लाँचिंगची सर्वांनाच उत्सुकता आहे. याचदरम्यान आता समोर आलेल्या माहितीने सर्वांनाच चकीत केले आहे. या कारच्या लाँचिंगसह कंपनी ग्राहकांना एक खास ऑफर देणार असल्याचे सांगितले जात आहे.

तुम्हाला 10 वर्षांपर्यंतची वॉरंटी मिळणार

दरम्यान, सध्या मार्केटमध्ये उपलब्ध असलेल्या बहुतेक इलेक्ट्रिक कार 8 वर्षांच्या वॉरंटीसह येतात. मात्र इतर कंपन्यांना मागे टाकत मारुती सुझुकीने 10 वर्षांपर्यंतच्या वॉरंटीसह त्यांची पहिली जागतिक इलेक्ट्रिक कार मारुती ईविटारा लॉन्च करण्याची योजना आखली आहे. मारुती सुझुकीने आपल्या कारसोबत 10 वर्षांची वॉरंटी देण्यामागील एक प्रमुख कारण म्हणजे ईविटारामध्ये BYD च्या ब्लेड बॅटरीचा वापर असल्याचे सांगितले जात आहे.

गाडीवाडीच्या अहवालानुसार, मारुती सुझुकीची मूळ कंपनी सुझुकी मोटर कॉर्पोरेशन युरोपियन कार मार्केटमध्ये त्यांच्या कारवर 3 वर्षे किंवा 1 लाख किमी आणि 6 वर्षे किंवा 1.5 लाख किमीची वॉरंटी देते. सुझुकी ईविटारासोबत काहीतरी हटके करु इच्छिते. कंपनी ओनरशिप कॉस्ट कमी करण्यासाठी 10 वर्षांपर्यंत किंवा सुमारे 2 लाख किमीची वॉरंटी देऊ शकते.

युरोपियन बाजारपेठेसाठी घोषणा केली

मारुती सुझुकीची मूळ कंपनी असलेल्या सुझुकी मोटर कॉर्पोरेशनने अलीकडेच युरोपियन मार्केटसाठी ईविटारासंबंधी काही अपडेट दिली. या अपडेटसोबत अशी माहिती देखील समोर आली की, कंपनी युरोपियन मार्केटला आकर्षित करण्यासाठी ईविटारासोबत शानदार ऑफर देऊ शकते. कंपनी सुरुवातीला ही कार ब्रिटन आणि नेदरलँड्ससारख्या मोठ्या युरोपीय मार्केटमध्ये लॉन्च करु शकते.

तथापि, ही ऑफर भारतीय मार्केटसाठी देखील उपलब्ध असेल की नाही हे अद्याप स्पष्ट झालेले नाही. बरं, भारत (India) हा मारुती सुझुकीसाठी सर्वात मोठ्या मार्केटपैकी एक असून उत्पादन केंद्रही आहे. अशा परिस्थितीत, इथेही तुम्हाला मारुती ईविटाराच्या लॉन्चिंगसह शानदार ऑफर्स मिळण्याची शक्यता आहे.

ब्लिकच्या अहवालानुसार, मारुती सुझुकी ईविटाराचे उत्पादन मे महिन्यात सुरु होऊ शकते. याच सुमारास ती भारतात लॉन्च होण्याची शक्यता आहे. कंपनी तिच्या गुजरात प्लांटमध्ये 100 हून अधिक जागतिक बाजारपेठांसाठी मारुती ईविटारा तयार करु शकते.