In Gurugram, 600 flats worth Rs 4 crore have been sold in just a few days, Real estate company Godrej Properties Limited:

देशात श्रीमंती आणि गरिबी यातील दरी किती वेगाने वाढत आहे, हे मालमत्तेच्या विक्रीतून स्पष्ट होते. एकीकडे देशातील मोठ्या लोकसंख्येला 30 लाख रुपयांचे घरही विकत घेता येत नाही, तर दुसरीकडे देशात एक असा वर्ग आहे जो खेळणी खरेदी केल्याप्रमाणे करोडोंच्या मालमत्ता खरेदी करत आहे.

ताजं प्रकरण गुरुग्राममधलं आहे. येथे 4 कोटी रुपये किमतीचे 600 फ्लॅट्स अवघ्या काही दिवसांत विकले गेले आहेत. रिअल इस्टेट कंपनी गोदरेज प्रॉपर्टीज लिमिटेडने ही माहिती दिली आहे.

कंपनीने दिलेल्या माहितीनुसार, गोदरेज प्रॉपर्टीज लिमिटेडने हरियाणातील गुरुग्राममध्ये आपल्या नवीन लक्झरी निवासी प्रकल्पातील 600 हून अधिक फ्लॅट विकले आहेत.

शेअर बाजाराला दिलेल्या माहितीत कंपनीने सांगितले की, गुरुग्राममधील सेक्टर-49 मधील गोल्फ कोर्स एक्स्टेंशन रोडवर असलेल्या गोदरेज अॅरिस्टोक्रॅट या प्रकल्पात त्यांनी 2,600 कोटी रुपयांहून अधिक किमतीचे फ्लॅट विकले आहेत.

9.5 एकरमध्ये पसरलेल्या या निवासी प्रकल्पात कंपनी सुमारे 750 अपार्टमेंट बांधणार आहे. त्यांची प्रति युनिट प्रारंभिक किंमत सुमारे 4 कोटी रुपये आहे.

कंपनीचे व्यवस्थापकीय संचालक आणि मुख्य कार्यकारी अधिकारी गौरव पांडे म्हणाले की, गुरुग्राम हे गोदरेज प्रॉपर्टीजसाठी अतिशय महत्त्वाचे मार्केट आहे. 2024 मध्ये गुरुग्राममध्ये चार नवीन प्रकल्प सुरू करण्याची आम्हाला आशा आहे.

गोदरेज प्रॉपर्टीजने सांगितले की, गेल्या तिमाहीत नोएडा येथील गोदरेज ट्रॉपिकल आयल या प्रकल्पातील 2,000 कोटींहून अधिकच्या मागील सर्वोत्तम विक्रीला मागे टाकून मिळवलेल्या विक्रीच्या मूल्याच्या बाबतीत हा प्रकल्प आतापर्यंतचा सर्वात यशस्वी निवासी प्रकल्प आहे.

एप्रिल-सप्टेंबर 2023-24 दरम्यान, गोदरेज प्रॉपर्टीजने त्यांच्या विक्री बुकिंगमध्ये 48 टक्के वाढ होऊन ती 7,288 कोटी रुपयांवर पोहोचली आहे. जी मागील वर्षीच्या याच कालावधीत 4,929 कोटी रुपये होती.

7,288 कोटी रुपयांच्या एकूण विक्री बुकिंगपैकी दिल्ली-एनसीआर बाजाराने 3,186 कोटी रुपयांचे योगदान दिले आहे.

यापूर्वी डिएलएफ ने केली अशी कामगिरी

अलीकडेच, रिअल इस्टेट कंपनी DLF लिमिटेडने गुरुग्राममध्ये असलेल्या एका निवासी प्रकल्पात तीन दिवसांत 1,137 लक्झरी अपार्टमेंट विकले. प्रत्येक फ्लॅटची किंमत 7 कोटी रुपयांपेक्षा जास्त होती आणि त्यांच्या विक्रीतून कंपनीला 8,000 कोटी रुपयांपेक्षा जास्त महसूल मिळाला.

डीएलएफचा हा प्रकल्प गुरुग्रामच्या सेक्टर ६३ मधील गोल्फ कोर्स एक्स्टेंशनमध्ये आहे. डीएलएफने सांगितले की, हा प्रकल्प लॉन्च झाल्यापासून तीन दिवसांत पूर्णपणे विकला गेला. त्याचवेळी डीएलएफने गोल्फ कोर्स रोडवरील फ्लॅट 100 कोटी रुपयांना विकला होता.