HDFC Bank Scam: तुमचे खातेही HDFC बँकेत असेल तर ही बातमी नक्की वाचा. देशात सायबर फसवणुकीच्या घटनांमध्ये सातत्याने वाढ होत आहे.

दरम्यान, एचडीएफसी बँकेच्या खातेधारकांचा डेटा लीक झाल्याची बातमी समोर आली आहे. गेल्या काही दिवसांपासून बँकेच्या 6 लाख ग्राहकांचा डेटा डार्क वेबवर लीक झाल्याचा दावा केला जात आहे. या अहवालात ग्राहकांची पर्सनल माहिती लीक झाल्याचा दावा केला जात आहे.

अहवाल आल्यानंतर लोक नाराज झाले

लोकप्रिय सायबर गुन्हेगारी मंचावर ग्राहकांची (Customers) माहिती पोस्ट केली गेली आहे. यासंबंधीचे अहवाल समोर आल्यानंतर लोक प्रचंड नाराज झाले आहेत.

सायबर गुन्हेगारांनी खातेदारांची नावे, ई-मेल, पत्ते आणि मोबाइल नंबरशी संबंधित डेटा लीक केल्याचा दावा या अहवालात करण्यात आला आहे. 6 लाख लोकांचा लीक झालेला डेटा डार्क वेबवर टाकण्यात आला आहे.

HDFC बँक स्टेटमेंट

या संपूर्ण प्रकरणावर एचडीएफसी बँकेकडून (HDFC Bank) निवेदनही आले आहे. बँकेने अधिकृत ट्विटर अकाऊंटवर ट्विट करुन असा दावा फेटाळला आहे.

एचडीएफसी बँकेचा कोणताही डेटा लीक झालेला नाही, असे बँकेच्या बाजूने सांगण्यात आले आहे. आमच्या सिस्टीमवर कोणत्याही प्रकारचा सायबर हल्ला झालेला नाही, असेही बँकेकडून सांगण्यात आले आहे. ग्राहकांचा डेटा पूर्णपणे सुरक्षित आहे.

बँकेने पुढे असेही सांगितले आहे की, बँकिंग इकोसिस्टमचे संपूर्ण निरीक्षण आहे. डेटा सुरक्षा आमच्यासाठी प्राथमिकता आहे. असे दावे बँकेने पूर्णपणे फेटाळून लावले आहेत.