Google lays off employees

गुगलने शेकडो कर्मचाऱ्यांना कामावरुन कमी केले आहे. गुगलच्या विविध प्रोजेक्टवरती काम करणाऱ्या कर्मचाऱ्यांचा यात समावेश आहे. अँड्रॉईड सॉफ्टवेअर, पिक्सल स्मार्टफोन आणि क्रोम ब्राऊझर या प्रोजेक्टवर काम करणाऱ्या शंभर कर्माचाऱ्यांना कामावरुन कमी केल्याचे वृत्त द इन्फॉर्मेशन या वृत्तपत्राने दिले आहे.

जानेवारी २०२५ मध्ये गुगलने कर्मचाऱ्यांना स्व - इच्छेने काम सोडण्यासाठी काही कर्मचाऱ्यांना आवाहन केले होते. त्यानंतर आता शंभर कर्मचाऱ्यांना कामावरुन कमी केले आहे. गुगल अँड्रॉईड आणि क्रोम या टीम्स पिक्सल आणि इतर ग्रुपमध्ये विलीन झाल्यानंतर हा निर्णय घेण्यात आला आहे. विलिनीकरण झाल्यानंतर या युनिटमधील कर्मचाऱ्यांची संख्या २० हजार झाली होती.

कर्मचारी कमी केल्याच्या माहितीला गुगलकडून अधिकृतपणे दुजोरा देण्यात आल्याची माहिती 'द इन्फॉर्मेशन'ने दिली आहे. अधिक प्रभावीपणे काम करण्यासाठी प्लॅटफॉर्म आणि डिव्हाईस टीम गेल्यावर्षी एकत्र करण्यात आल्या. जानेवारीत राबविण्यात आलेल्या स्वेच्छा कार्मक्रमानंतर आता देखील काही कर्मचाऱ्यांना कामावरुन कमी करण्यात आले आहे. दरम्यान, आवश्यक जागा भरण्याची प्रक्रिया अमेरिकेसह इतर सर्वत्र सुरु असल्याची माहिती कंपनीच्या वतीने द इन्फॉर्मेशनला देण्यात आली आहे.

यापूर्वी गुगलने २०२३ मध्ये जगभरातून जवळपास सहा टक्के कर्मचारी कपात केली होती. त्यानंतरही काही प्रमाणात वारंवार कपात करण्यात आली. दरम्यान, गुगलची सध्याची कर्मचारी संख्या सुमारे एक लाख ८० हजार एवढी आहे. अँड्रॉईड, पिक्सल आणि क्रोम प्रोजेक्टवर काम करणाऱ्या अमेरिकेतील काही कर्मचाऱ्यांना स्व-इच्छेने काम सोडण्याचे आवाहन केले होते.

कंपनीच्या विलिनीकरण धोरणाप्रमाणे जे नव्या आव्हानांचा सामना करु शकत नाहीत किंवा अपेक्षेप्रमाणे काम करु शकत नाहीत त्यांना स्व -इच्छेने काम सोडण्याच्या सूचना देण्यात आल्या होत्या.