CNG-PNG Price: वेगाने वाढणाऱ्या महागाईच्या पार्श्वभूमीवर एक चांगली बातमी समोर आली आहे. मुंबईला गॅस पुरवठा करणाऱ्या महानगर गॅस लिमिटेडने पाइप्ड नॅचरल गॅस (PNG) आणि कॉम्प्रेस्ड नॅचरल गॅस (CNG) च्या किमतीत कपात करण्याची घोषणा केली आहे . सरकारने देशांतर्गत उत्पादित नैसर्गिक वायूचा पुरवठा वाढवल्यानंतर, ग्राहकांना दिलासा देण्यासाठी कंपनीने हे पाऊल उचलले आहे.

अधिकृत निवेदनानुसार, पीएनजीची किंमत 4 रुपये प्रति घनमीटरने कमी करून 48.50 रुपये करण्यात आली आहे . त्याचवेळी, सीएनजीच्या दरात प्रति किलो 6 रुपयांनी कपात करून 80 रुपये प्रति किलो झाली आहे. MGL ने एका निवेदनात म्हटले आहे की, किमतीच्या सुधारणेनंतर, देशाची आर्थिक राजधानी मुंबईतील वाहन मालक इतर इंधनांच्या तुलनेत CNG च्या किमतीत 48 टक्के बचत करू शकतील . दुसरीकडे, पीएनजीच्या बाबतीत, ग्राहकांना सर्वाधिक वापरल्या जाणार्‍या लिक्विफाइड पेट्रोलियम गॅस (LPG) च्या तुलनेत 18 टक्के बचत मिळेल.

मुंबईशिवाय पुण्यातही सीएनजीच्या दरात कपात करण्यात आली आहे. पुण्यात सीएनजीच्या दरात 1 रुपयांनी कपात करण्यात आली आहे. या कपातीनंतर आता पुण्यात एक किलो सीएनजीचा दर 87 रुपयांवर पोहोचला आहे. ऑल इंडिया पेट्रोल डीलर्स असोसिएशनचे प्रवक्ते अली दारूवाला यांच्या हवाल्याने एएनआय या वृत्तसंस्थेने ही माहिती दिली आहे.