Share Market: बाबा रामदेव यांच्या नेतृत्वाखालील पतंजली समूहाची कंपनी पतंजली फूड्स लिमिटेड (पीएफएल) ला मोठा झटका बसला आहे.

वास्तविक, शेअर बाजारात NSE आणि BSE ने पतंजली फूड्स लिमिटेड (PFL) च्या प्रवर्तकांच्या शेअर्सवर बंदी घातली आहे. मात्र, या निर्णयामुळे कामकाजावर कोणताही परिणाम होणार नसल्याचे कंपनीने म्हटले आहे.

पतंजली फूड्स लिमिटेड म्हटले की, 'कंपनीतील प्रवर्तकांच्या शेअरहोल्डिंगवर रोख लावला तरी आमच्या आर्थिक स्थिती आणि कामकाजावर परिणाम होणार नाही.'

पतंजली फूड्स

पतंजली फूड्स लिमिटेडने माहिती दिली की, बीएसई आणि एनएसईने पतंजली आयुर्वेद लिमिटेड, आचार्य बालकृष्ण, पतंजली ट्रान्सपोर्ट आणि पतंजली ग्रामोद्योग न्यास यांच्यासह त्यांच्या 21 प्रवर्तक संस्थांच्या शेअर्समध्ये (Shares) किमान सार्वजनिक शेअरहोल्डिंग नियमांचे पालन न केल्याबद्दल बंदी घातली आहे.

सिक्युरिटीज कॉन्ट्रॅक्ट्स (रेग्युलेशन) नियम, 1957 चा नियम 19A(5) सूचीबद्ध घटकासाठी किमान सार्वजनिक शेअरहोल्डिंग (MPS) 25 टक्के असणे अनिवार्य करते.

पतंजली फूड्स शेअर

पतंजली फूड्सने माहिती दिली की, त्यांचे प्रवर्तक किमान सार्वजनिक शेअरहोल्डिंग साध्य करण्यासाठी पूर्णपणे वचनबद्ध आहेत आणि या संदर्भात चर्चा सुरु आहे.

कंपनीचे म्हणणे आहे की, ते यासाठी सातत्याने प्रयत्न करत आहेत. कंपनीच्या प्रवर्तकांना खात्री आहे की, त्यांना पुढील काही महिन्यांत अनिवार्य एमपीएस मिळेल.

पतंजली

सध्या, कंपनीचे 19.18 टक्के शेअर्स सार्वजनिक भागधारकांकडे आहेत आणि MPA साध्य करण्यासाठी सार्वजनिक शेअरहोल्डिंग 5.82 टक्क्यांनी वाढवावे लागेल.

शेअर्सवरील बंदीच्या या आदेशामुळे एकूण 29,25,76,299 इक्विटी शेअर्स प्रभावित होतील. NSE वर पतंजली (Patanjali) फूड्सच्या स्टॉकची 52 आठवड्यांची उच्च किंमत 1495 रुपये आहे आणि 52 आठवड्यांची नीचांकी किंमत 865.85 रुपये आहे.

16 मार्च 2023 रोजी कंपनीचा शेअर दुपारी 2.30 पर्यंत घसरणीसह 944 रुपयांच्या आसपास व्यवहार करत होता.