Chodan-Madel Gramsabha: पर्यावरणाचा नाश करणाऱ्या विकास प्रकल्पांना चोडण आणि दिवारमधून विरोध!!

चोडण: गोव्यातील प्रसिद्ध दिवार बेटाला पर्यटन गाव म्हणून घोषित करण्याला आणि इथे इको-टुरिझम प्रकल्प राबविण्याच्या राज्य सरकारच्या योजनेला गोव्यातील चोडण-माडेल ग्रामसभेने तीव्र विरोध केला आहे.ग्रामपंचायतीने यामुळे होणाऱ्या संभाव्य परिणामांवर लक्ष केंद्रित केले. बेटावरचे वातावरण आणि अपुऱ्या पायाभूत सुविधा यांवरही त्यांनी चिंता व्यक्त केली. ग्रामसभेत स्थानिकांकडून अनियमित पाणी आणि वीजपुरवठा, अरुंद रस्ते आणि फेरी सेवा या प्रमुख समस्यांचा उल्लेख करण्यात आला.

स्थानिक अर्थव्यवस्थेसाठी पर्यटनाचे महत्त्व मान्य करतानाच ग्रामसभेने शाश्वत विकासाच्या गरजेवर भर दिला.आलेल्या पर्यटकांच्या गरजा पुरवण्यासाठी विद्यमान पायाभूत सुविधा अपुऱ्या पडत असल्याचं ग्रामस्थ म्हणाले आहेत आणि सोबतच त्यांनी अशा कोणत्याही विकासासाठी स्थानिक समुदायाच्या गरजांना प्राधान्य दिले पाहिजे असेही नमूद केले आहे. ग्रामसभेने या बेटावर होणाऱ्या मोठ्या प्रकल्पांचा एकमताने विरोध केला. या मेगा प्रकल्पांमुळे पर्यावरणावर विपरीत परिणाम होईल तसेच विद्यमान संसाधनांवरील ताण येईल असे स्थानिकांचे म्हणणे आहे.