Chodan News: चोडण येथे ५० लाख खर्चून दोन स्मशानभूमींचे नूतनीकरण; आमदार प्रेमेंद्र शेट यांच्या हस्ते उद्‍घाटन

डिचोली: सुमारे ५० लाख रुपये खर्च करून चोडण पंचायत क्षेत्रातील दोन स्मशानभूमींचे नूतनीकरण करण्यात आले आहे. ग्रामीण विकास यंत्रणेच्या सहकार्यातून देवगी आणि मुड्डी येथील स्मशानभूमीत आवश्यक सुविधा उपलब्ध करून देण्यात आल्या आहेत. आमदार प्रेमेंद्र शेट यांच्या हस्ते या विकसित कामाचे उद्‍घाटन करण्यात आले.

यावेळी उत्तर गोवा जिल्हा पंचायतीचे अध्यक्ष शंकर चोडणकर, सरपंच रवींद्र किनळकर, अन्य पंचसदस्य तसेच माजी सरपंच कमलाकांत वाडयेकर, नार्वेचे सरपंच संदेश पार्सेकर आदी उपस्थित होते.

पार्थिवांवर सुरळीतपणे अंत्यसंस्कार व्हावेत, अशी मृत व्यक्तीच्या कुटुंबांची इच्छा असते. त्यासाठी स्मशानभूमीत आवश्‍यक सर्व सोयी असणे गरजेचे आहे. मुख्यमंत्री डॉ. प्रमोद सावंत आणि ग्रामीण विकासमंत्री गोविंद गावडे यांच्या सहकार्यामुळे चोडण येथील स्मशानभूमींचा विकास करता आला, असे आमदार प्रेमेंद्र शेट यांनी सांगितले.