बॉलिवूड अभिनेता राजपाल यादवला चेक बाऊन्स प्रकरणात मोठा कायदेशीर धक्का बसला आहे. दिल्ली उच्च न्यायालयाने त्यांच्या विरोधातील दोषसिद्धी कायम ठेवत त्यांना तीन महिन्यांच्या साध्या कारावासाची शिक्षा सुनावली आहे. न्यायालयाने त्यांच्या तसेच इतर संबंधितांनी दाखल केलेल्या याचिका फेटाळून लावत खालच्या न्यायालयाचा निर्णय मोठ्या प्रमाणात कायम ठेवला.
हे प्रकरण एम/एस मुरली प्रोजेक्ट्स प्रायव्हेट लिमिटेड या कंपनीने दाखल केलेल्या सात वेगवेगळ्या चेक बाऊन्स प्रकरणांशी संबंधित आहे. न्यायालयाने प्रत्येक प्रकरणात तीन महिन्यांच्या साध्या कारावासाची शिक्षा सुनावली असली, तरी सर्व शिक्षा एकाचवेळी (Concurrent) भोगण्याचे आदेश दिले आहेत. त्यामुळे प्रत्यक्ष कारावासाचा कालावधी तीन महिन्यांचाच राहणार आहे.
कारावासासोबतच न्यायालयाने आर्थिक दंडाचेही आदेश दिले आहेत. प्रत्येक प्रकरणात राजपाल यादव यांनी 1.05 कोटी रुपये अदा करावेत, असे निर्देश देण्यात आले आहेत. तसेच त्यांच्या पत्नी राधा राजपाल यादव यांनाही प्रत्येक प्रकरणात 5 कोटी रुपयांहून अधिक रक्कम भरण्याचे आदेश न्यायालयाने दिले आहेत.
न्यायालयाने निरीक्षण नोंदवताना म्हटले की, तक्रारदार कंपनीसोबत समझोता करून देय रक्कम भरण्यासाठी राजपाल यादव यांना अनेक वेळा संधी देण्यात आली होती. त्यांनी आणि त्यांच्या वकिलांनी न्यायालयात वारंवार आश्वासने दिली; मात्र त्या आश्वासनांची पूर्तता करण्यात ते अपयशी ठरले. त्यामुळे दोषसिद्धीत हस्तक्षेप करण्याचे कोणतेही कारण नसल्याचे न्यायालयाने स्पष्ट केले.
या निर्णयाविरोधात सर्वोच्च न्यायालय किंवा अन्य सक्षम न्यायालयात दाद मागता यावी, यासाठी दिल्ली उच्च न्यायालयाने राजपाल यादव यांना दोन महिन्यांची मुदत दिली आहे. त्यामुळे ते पुढील कायदेशीर पर्यायांचा अवलंब करू शकतात.
या प्रकरणात 2024 मध्ये सत्र न्यायालयाने त्यांना सहा महिन्यांच्या कारावासाची शिक्षा सुनावली होती. त्यानंतर उच्च न्यायालयाने समझोत्याची शक्यता लक्षात घेऊन शिक्षेला तात्पुरती स्थगिती दिली होती. काही रक्कम जमा केल्यानंतर त्यांना अंतरिम दिलासाही मिळाला होता. मात्र न्यायालयाने सांगितलेल्या उर्वरित रकमेचा भरणा वेळेत न झाल्याने अखेर दोषसिद्धी कायम ठेवत नव्याने शिक्षा सुनावण्यात आली.
राजपाल यादव यांचे नाव यापूर्वीही आणखी एका कथित कर्जविषयक चेक बाऊन्स प्रकरणात चर्चेत आले होते. त्या प्रकरणातही न्यायालयाने त्यांच्याविरोधात कठोर भूमिका घेतली होती. त्यामुळे आर्थिक व्यवहारांशी संबंधित प्रकरणांमुळे अभिनेता पुन्हा एकदा चर्चेच्या केंद्रस्थानी आला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.