गेल्या सात दशकांहून अधिक काळ आपल्या जादुई आवाजाने रसिकांच्या मनावर अधिराज्य गाजवणाऱ्या गानसम्राज्ञी आशा भोसले यांनी आज अखेरचा श्वास घेतला. काल संध्याकाळी त्यांना हृदयविकाराचा तीव्र झटका आल्याने तातडीने मुंबईतील ब्रीच कॅन्डी रुग्णालयात दाखल करण्यात आले होते. डॉक्टरांचे शर्थीचे प्रयत्न सुरू असतानाच आज त्यांची प्राणज्योत मालवली. त्यांच्या निधनाचे वृत्त समजताच केवळ मनोरंजन सृष्टीच नव्हे, तर संपूर्ण देश हळहळला आहे.
आशाताईंचा प्रवास हा केवळ एका गायिकेचा प्रवास नसून तो भारतीय संगीताचा इतिहास आहे. त्यांनी आपल्या कारकिर्दीत मराठी, हिंदीसह विविध भारतीय आणि परदेशी भाषांमध्ये मिळून सुमारे १२ हजार पेक्षा जास्त गाणी गायली आहेत. शास्त्रीय संगीतापासून ते उडत्या चालीच्या कॅबरे सॉंग्सपर्यंत आणि भावगीतांपासून ते गझलपर्यंत सर्वच प्रकारच्या गायकीवर त्यांनी आपली मोहोर उमटवली. त्यांच्या आवाजातील लवचिकता आणि शब्दांना जिवंत करण्याची शैली अजोड होती.
आशाताईंचे बालपण आणि सुरुवातीचा काळ संघर्षाचा होता. ओ. पी. नय्यर, आर. डी. बर्मन यांसारख्या महान संगीतकारांसोबत त्यांनी दिलेली अजरामर गाणी आजही तितकीच टवटवीत वाटतात. त्यांच्या गाण्याने केवळ चित्रपटसृष्टीलाच उंची मिळवून दिली नाही, तर सुरांच्या माध्यमातून प्रत्येक पिढीला जगण्याची नवी उमेद दिली.
रुग्णालयात दाखल केल्यानंतर त्यांच्या प्रकृतीत सुधारणा होईल, अशी आशा चाहत्यांना होती. समाजमाध्यमांवरून त्यांच्या उत्तम आरोग्यासाठी प्रार्थना केली जात होती. मात्र, आज काळाने या सुरांच्या मलिकेला आपल्यातून हिरावून नेले. त्यांच्या जाण्याने केवळ एक गायिका गेली नसून, भारतीय संस्कृतीचा एक मौल्यवान वारसा हरपला आहे. बॉलीवूडसह जगाच्या कानाकोपऱ्यातील संगीत प्रेमींनी त्यांना सोशल मीडियाद्वारे भावपूर्ण श्रद्धांजली अर्पण केली आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.