रुग्णालयातून डिस्चार्ज मिळताच नवनीत राणा उद्धव ठाकरेंवर कडाडल्या

अपक्ष खासदार नवनीत राणा यांना लीलावती रुग्णालयातून डिस्चार्ज मिळाला आहे. रुग्णालयातून बाहेर येताच नवनीत राणांनी मुख्यमंत्री उद्धव ठाकरे यांना खुले आव्हान दिले आहे. त्या म्हणाल्या, “मी उद्धव ठाकरे यांना आव्हान देते की तुमच्यात दम असेल तर तुम्ही लोकांमधून निवडून येऊन दाखवा. उद्धव ठाकरे महाराष्ट्रातील ज्या जिल्ह्यात उभे राहतील तेथे मी उभी राहून जिंकून दाखवेन," असेही त्या म्हणाल्या. (Navneet Rana slams Uddhav Thackeray)

नवनीत राणा पुढे म्हणाल्या, “माझा ठाकरे सरकारला सवाल आहे की मी अशी काय चूक केली की त्याची मला शिक्षा देण्यात आली. जर हनुमान चालिसाचे पठण करणे आणि श्रीराम यांचे नाव घेणे गुन्हा असेल तर मी 14 दिवस नाही, तर 14 वर्षे तुरुंगात राहण्यास तयार आहे.”

मुख्यमंत्री उद्धव ठाकरे यांचे निवासस्थान असलेल्या 'मातोश्री'बाहेर हनुमान चालीसाचे पठण करण्याप्रकरणी महाराष्ट्र पोलिसांनी 23 एप्रिल रोजी नवनीत राणा आणि त्यांचे पती रवी राणा यांना अटक केली होती. दाम्पत्याची सुटका झाल्यानंतर नवनीत यांना वांद्रे येथील लीलावती रुग्णालयात नेण्यात आले. दरम्यान, वॉर्डच्या आतून एक व्हिडिओ क्लिप व्हायरल झाली होती, ज्यामध्ये नवनीत रुग्णालयातील बेडवर झोपल्या होत्या आणि रवी राणा त्यांचे सांत्वन करत होते.

रवी राणा म्हणाले, "गेल्या सहा दिवसांपासून ती तुरुंग अधिकाऱ्यांना रुग्णालयात दाखल करण्याची विनंती करत होती, मात्र त्यांनी त्याची दखल घेतली नाही."