Mumbai Goa Highway: पावसाचा कहर! मुंबई-गोवा महामार्गावर दिसली जखमी मगर, मुसळधार पावसाचा वन्यजीवांना धोका

Mumbai Goa Highway Injured Crocodile: रविवारी (17 ऑगस्ट) रात्री मुंबई-गोवा महामार्गावरील माणगाव येथील राऊत सर्जिकल हॉस्पिटलच्या समोर एक मोठी मगर जखमी अवस्थेत आढळून आली.
injured crocodile
injured crocodileDainik Gomantak
Published on
Updated on

Mumbai Goa Highway Injured Crocodile: गेल्या दोन-तीन दिवसांपासून रायगड जिल्ह्याला मुसळधार पावसाने झोडपून काढले आहे. या संततधार पावसामुळे अनेक नद्या आणि स्थानिक जलस्रोत दुथडी भरुन वाहत आहेत. या मुसळधार पावसाचा फटका वन्यजीवांना देखील बसत असून त्यांच्या नैसर्गिक अधिवासातून बाहेर पडण्याच्या घटना वाढल्या आहेत. अशीच एक धक्कादायक घटना रविवारी (17 ऑगस्ट) रात्री मुंबई-गोवा महामार्गावर घडली. माणगाव येथील राऊत सर्जिकल हॉस्पिटलच्या समोर एक मोठी मगर जखमी अवस्थेत आढळून आली.

नेमकं काय घडलं?

स्थानिक रहिवाशांनी दिलेल्या माहितीनुसार, रविवारी रात्री उशिरा महामार्गावर वाहतूक कमी असताना काही प्रवाशांना रस्त्याच्या कडेला एक मगर (Crocodile) जखमी अवस्थेत दिसली. मुसळधार पावसामुळे ती पूर्णपणे ओली झाली होती आणि तिच्या शरीराला किरकोळ दुखापत झाल्याचे दिसून आले.

injured crocodile
Mumbai-Goa Highway: गणेशोत्सवासाठी गावी जाताय? मुंबई-गोवा महामार्गावर असणार 'या' वाहनांना बंदी! वाचा सविस्तर माहिती

वन्यजीव विभागाच्या बचाव पथकाने तातडीने घटनास्थळी धाव घेतली. रात्र आणि मुसळधार पाऊस यामुळे बचावकार्यात अडथळे येत होते, तरीही पथकाने मोठ्या हिमतीने काम केले. ही मगर सुमारे 8 ते 10 फूट लांबीची होती. पथकाने अत्यंत सावधगिरीने तिला सुरक्षितरित्या पकडले आणि पुढील उपचारांसाठी माणगाव येथील वन विभागाच्या बचाव केंद्रात हलवले. मात्र मगरीला अधिक उपचाराची गरज होती. त्यामुळे मुख्यवनसंरक्षक प्रवीण एन. आर. यांनी पुणे येथील रेस्क्यू संस्थेकडे नेण्याची परवानगी दिली.

मगर महामार्गावर का आली?

वन्यजीव अधिकाऱ्यांच्या म्हणण्यानुसार, गेल्या काही दिवसांपासून सुरु असलेल्या मुसळधार पावसामुळे (Rain) मगरीच्या नैसर्गिक अधिवासातील नद्यांचे पाणी वाढले आहे. माणगाव परिसरातील काळ नदी आणि आजूबाजूच्या जलाशयांमध्ये मगरींचा वावर असतो. पाण्याचा प्रवाह वाढल्याने आणि पुरासारखी परिस्थिती निर्माण झाल्यामुळे मगरीने सुरक्षित ठिकाण शोधण्यासाठी आपला अधिवास सोडला असावा, अशी शक्यता वर्तवली जात आहे. वाट काढताना ती थेट महामार्गावर पोहोचली आणि एखाद्या वाहनाच्या धडकेमुळे किंवा अन्य कारणांमुळे जखमी झाली असावी, असा प्राथमिक अंदाज आहे.

injured crocodile
Mumbai Goa Highway Accident: मुंबई-गोवा महामार्गावर भीषण अपघात! कारची दुचाकीला धडक, महिलेचा जागीच मृत्यू

वन्यजीव विभागाचे आवाहन

दरम्यान, या घटनेनंतर वन्यजीव विभागाच्या अधिकाऱ्यांनी नागरिकांना सतर्क राहण्याचे आवाहन केले आहे. पावसाळ्यात नद्या आणि पाण्याच्या स्रोतांच्या जवळपास जाणे टाळावे. जर कोणत्याही वन्यजीवाला, विशेषतः मगर किंवा अन्य धोकादायक प्राण्याला पाहिले, तर त्याला त्रास न देता तात्काळ वन विभाग किंवा आपत्कालीन सेवांना माहिती द्यावी, असे आवाहन अधिकाऱ्यांनी केले आहे.

सध्या मगरीवर उपचार सुरु असून ती पूर्णपणे बरी झाल्यानंतर तिला पुन्हा तिच्या नैसर्गिक अधिवासात सुरक्षितपणे सोडले जाईल, अशी माहिती देण्यात आली आहे. मानवी वस्ती आणि वन्यजीवांचे अधिवास यांच्यातील वाढता संघर्ष या घटनेमुळे पुन्हा एकदा समोर आला आहे. निसर्ग आणि वन्यजीवांचा आदर करणे किती महत्त्वाचे आहे, हेच या घटनेतून अधोरेखित होते.

दैनिक गोमंतकचे सदस्य व्हा

शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.

Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.

Related Stories

No stories found.
Goa News on Dainik Gomantak
dainikgomantak.esakal.com