राज ठाकरेंच्या आदेशानंतर मशिदींसमोर मनसैनिकांनी केले हनुमान चालीसाचे पठण

मनसे अध्यक्ष राज ठाकरे यांच्या पत्रानंतर आज मुंबा देवी दर्ग्यासमोर मनसैनिकांकडून आज सकाळी हनूमान चालिसाचे पठण करण्यात आले आहे. महाराष्ट्रातील (Maharashtra) वेगवेगळ्या ठिकाणी सकाळी हनूमान चालीसाचे पठण करण्यात आले भोंगेही लावण्यात आले. राज्यातील सुरक्षा आणि सुव्यवस्था नियंत्रीत ठेवण्यासाठी अनेक ठिकाणी आता मनसे सैनिकांना अटक करण्यात येत आहे. त्याचबरोबर त्यांच्या सोबत असलेले साहित्यही जप्त करण्यात येत आहेत. दरम्यान लाऊडस्पीकरच्या या वादावरून महाराष्ट्रात जे वातावरण निर्माण झाले त्यांचा अंदाज घेता मनसे अध्यक्ष राज ठाकरे यांच्या मुंबईतील निवासस्थानाबाहेर सुरक्षा वाढवण्यात आली आहे. (Hanuman Chalisa Raj Thackeray)

बुधवारी कुठेही लाऊडस्पीकरवर (Loudspeaker) मोठ्याने अजान ऐकू आल्यास हनुमान चालीसा लाऊडस्पीकरवर लावा, असे आवाहन महाराष्ट्र नवनिर्माण सेनेचे अध्यक्ष राज ठाकरे यांनी काल मंगळवारी केले . अजान लाऊडस्पीकरच्या आवाजाने लोकांना त्रास होत असेल तर 100 डायल करून पोलिसांकडे तक्रार करा , असे ठाकरे यांनी एका खुल्या पत्रात सांगितले .

'रोज तक्रार व्हायला हवी. मी तमाम हिंदूंना आवाहन करतो की, 4 मे रोजी लाऊडस्पीकरवर जिथे अजान दिली जाते, तिथे तुम्ही हनुमान चालीसा लाऊडस्पीकरवर लावा आणि त्यांनाही लाऊडस्पीकर लावल्याने काय अडचण होते हे समजू द्या. मशिदींवरील लाऊडस्पीकरच्या मुद्द्यावर सर्व स्थानिक मंडळे आणि सजग नागरिकांनी स्वाक्षरी मोहीम राबवून आपल्या परिसरातील पोलीस ठाण्यात जमा करावी,' असे आवाहन राज ठाकरे यांनी केले.