Bison In Sawantwadi: एक, दोन नव्हे… थेट 15 गवारेड्यांचा धुमाकूळ! लोकांना फुटला घाम, तत्काळ बंदोबस्त करण्याची मागणी

सिंधुदुर्ग : सावंतवाडी तालुक्यातील कोलगाव येथे तब्बल १५ गवारेड्यांचा कळप आढळून आला आहे. जंगलातून बाहेर आलेल्या या गवारेड्यांच्या कळपामुळे गावात एकच खळबळ उडाली आहे. या कळपाला पाहण्यासाठी नागरिकांनी मोठी गर्दी केली होती, मात्र एवढ्या संख्येने गवे एका ठिकाणी दिसल्यामुळे नागरिकांमध्ये भीतीचं वातावरण पसरले आहे.

कोलगाव परिसरात एका वेळेस एवढ्या मोठ्या संख्येने गवे बाहेर आल्याचा हा पहिलाच प्रकार असल्याचं स्थानिकांनी सांगितलं. गावालगत असलेल्या शेतात हा कळप उतरला होता. काही वेळ तेथेच थांबून पुन्हा जंगलाच्या दिशेने ते निघून गेले.

या घटनेमुळे स्थानिक ग्रामस्थांमध्ये भीती निर्माण झाली असून वनविभागाने तत्काळ लक्ष देण्याची मागणी केली आहे. गवे आक्रमक स्वभावाचे असल्याने गर्दी करणे धोकादायक असते, असा इशाराही वनविभागाने दिला आहे. दरम्यान, या घटनेचे व्हिडिओ आणि फोटो सोशल मीडियावर मोठ्या प्रमाणावर व्हायरल होत आहेत.

बांगायतदारांनाही या गवारेड्यांच्या कळपामुळे अडचणींचा सामना करावा लागत आहे. शेतशिवारात उतरलेल्या गवांनी उसाचे आणि इतर पिकांचे नुकसान करण्याची भीती व्यक्त केली जात आहे. आधीच पावसाळ्यामुळे शेतीच्या कामात अडथळे येत असताना गवांच्या या वाढत्या वावरामुळे शेतकऱ्यांमध्ये चिंता वाढली आहे.