Five Players T20I Debut for Team India in 16 Days:
भारतीय टी20 संघ सध्या आयर्लंड दौऱ्यावर आहे. या दौऱ्यातील टी20 मालिकेला शुक्रवारपासून (18 ऑगस्ट) सुरुवात झाली आहे. डब्लिनला झालेल्या पहिल्या सामन्यातून भारताकडून रिंकू सिंग आणि प्रसिद्ध कृष्णा यांचे आंतरराष्ट्रीय टी20 क्रिकेटमध्ये पदार्पण झाले.
त्यामुळे गेल्या 16 दिवसात तब्बल 5 खेळाडूंचे भारताकडून आंतरराष्ट्रीय टी20 क्रिकेटमध्ये पदार्पण झाले आहे. भारतीय संघ आयर्लंड दौऱ्यावर येण्यापूर्वी वेस्ट इंडिज दौऱ्यावर होता. या दौऱ्यात 3 ते 13 ऑगस्ट दरम्यान भारताने 5 टी20 सामन्यांची मालिका खेळली.
या मालिकेतून तिलक वर्मा, मुकेश कुमार आणि यशस्वी जयस्वाल या खेळाडूंचे आंतरराष्ट्रीय टी20 क्रिकेटमध्ये पदार्पण झाले. दरम्यान, त्यांच्या कामगिरीबद्दल जाणून घेऊ.
20 वर्षीय तिलक वर्माने 3 ऑगस्ट रोजी वेस्ट इंडिज विरुद्धच्या पहिल्या टी20 सामन्यातून पदार्पण केले होते. त्याने पदार्पणाच्या सामन्यातच प्रभावी कामगिरी करताना दुसऱ्या आणि तिसऱ्या चेंडूवर सलग षटकार ठोकण्याचा कारनामाही केला.
त्याने पहिल्या सामन्यात 22 चेंडूत 39 धावांची खेळी केली होती. त्याने आत्तापर्यंत ६ सामने खेळताना 1 अर्धशतकासह 173 धावा केल्या.
वेगवान गोलंदाज मुकेश कुमारनेही 3 ऑगस्ट रोजी वेस्ट इंडिज विरुद्धच्या पहिल्या टी20 सामन्यातून पदार्पण केले होते. त्याने पदार्पणाच्या सामन्यात 3 षटकात 24 धावा दिल्या होत्या, त्याला विकेट घेता आली नव्हती. त्याने आत्तापर्यंत 5 टी20 सामने खेळताना ३ विकेट्स घेतल्या आहेत.
युवा सलामीवीर यशस्वी जयस्वालची चर्चा गेल्या अनेक दिवसांपासून सुरू असून त्याने 8 ऑगस्ट रोजी वेस्ट इंडिज विरुद्धच्या तिसऱ्या टी20 सामन्यातून पदार्पण केले.
पण त्याच्यासाठी पदार्पणाचा सामना फारसा खास ठरला नाही, तो 1 धावेवरच बाद झाला. पण त्यानंतर त्याने शानदार कामगिरी केली. त्याने आत्तापर्यंत भारताकडून 4 टी20 सामने खेळताना 1 अर्धशतकासह 114 धावा केल्या.
रिंकूने 18 ऑगस्ट रोजी आयर्लंडविरुद्धच्या पहिल्या टी20 सामन्यातून पदार्पण केले. पण त्याला फलंदाजीची संधी मिळाली नाही. हे त्याचे आंतरराष्ट्रीय क्रिकेट पदार्पणही ठरले.
प्रसिद्ध कृष्णा यानेही रिंकू प्रमाणे 18 ऑगस्ट रोजी आयर्लंडविरुद्धच्या पहिल्या टी20 सामन्यातून पदार्पण केले. त्याने पदार्पणात 4 षटकात 32 धावा देताना 2 विकेट्स घेतल्या. त्याने यापूर्वी भारताकडून 14 वनडे सामने खेळले आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.