Steve Smith Century in WTC 2023 Final: ऑस्ट्रेलिया विरुद्ध भारत संघात कसोटी चॅम्पियनशीप 2021-23 स्पर्धेचा अंतिम सामना द ओव्हल मैदानावर बुधवारपासून (7 जून) सुरू आहे. या सामन्याच्या दुसऱ्या दिवशी म्हणजेच गुरुवारी (8 जून) स्टीव्ह स्मिथने शतक पूर्ण केले.
या सामन्यात ऑस्ट्रेलियाचा संघ प्रथम फलंदाजी करत आहे. ऑस्ट्रेलियाकडून पहिल्या दिवसाखेर पहिल्या डावात स्मिथ 95 धावांवर नाबाद होता. त्यानंतर तो दुसऱ्या दिवशी पुन्हा ट्रेविस हेडसह फलंदाजीला उतरला.
दुसऱ्या दिवसाच्या पहिल्याच षटकात म्हणजेच डावाच्या 86 व्या षटकाच्या दुसऱ्या आणि तिसऱ्या चेंडूवर मोहम्मद सिराजविरुद्ध सलग दोन चौकार ठोकत त्याचे कसोटी कारकिर्दीतील 31 वे शतक साजरे केले. स्मिथने 229 चेंडूत त्याचे हे शतक पूर्ण केले.
त्याने हे शतक पूर्ण केल्यानंतर नेहमीप्रमाणे हेल्मेट आणि बॅट उंचावत सेलिब्रेशन केले. तसेच त्यावेळी ऑस्ट्रेलियाच्या ड्रेसिंग रुममध्ये त्याच्या संघसहकाऱ्यांनी उभे राहून टाळ्या वाजवून त्याचे कौतुक केले. त्याचबरोबर त्याच्याबरोबर फलंदाजी करत असलेल्या ट्रेविस हेडनेही त्याचे अभिनंदन केले.
दरम्यान, स्मिथचे हे इंग्लंडमधील 7 वे शतक आहे. तसेच ओव्हलच्या मैदानावरील तिसरे शतक आहे. त्याने या मैदानावर चौथा कसोटी सामना खेळताना जवळपास 124 च्या सरासरीने धावा फटकावल्या आहेत.
याशिवाय स्मिथ आता ऑस्ट्रेलियाकडून सर्वाधिक कसोटी शतके करणाऱ्या खेळाडूंमध्ये मॅथ्यू हेडनलाही मागे टाकले. हेडनने कसोटी कारकिर्दीत ३० शतके केली आहेत. या यादीत अव्वल क्रमांकावर ४१ शतकांसह रिकी पाँटिंग आहे. तसेच ३२ शतकांसह स्टीव्ह वॉ आहेत. त्यानंतर आता ३१ शतकांसह स्मिथ आहे.
41 - रिकी पाँटिंग
32 - स्टीव्ह वॉ
31 - स्टीव्ह स्मिथ
30 - मॅथ्यू हेडन
29 - सर डॉन ब्रॅडमन
स्मिथने शतक पूर्ण केल्यानंतर 89 व्या षटकात हेडने चौकारासह त्याचे दीडशतक पूर्ण केले. त्याने 164 चेंडूत दीडशतक पूर्ण केले. दरम्यान, त्याने सामन्याच्या पहिल्याच दिवशी शतक पूर्ण केले होते. तो पहिल्या दिवसाखेर 146 धावांवर नाबाद होता.
त्यानंतर आता त्याने दुसऱ्या दिवशी सुरुवातीलाच 150 धावांचा टप्पा पूर्ण केला. त्यामुळे ऑस्ट्रेलियाने आता पहिल्या डावात 350 धावांचा टप्पाही पूर्ण केला आहे.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.