Virat Kohli: कोहलीने दाखवलं विराट मन, श्रीलंकेतील नवोदित क्रिकेटर्सला दिला मोलाचा सल्ला, पाहा स्पेशल Video

Virat Kohli shares his experience with budding cricketers in Sri Lanka: आशिया चषक 2023 स्पर्धेत सुपर फोर फेरी सुरू झाली असून आता उर्वरित सर्व सामने कोलंबोमध्ये होणार आहेत. या फेरीत रविवारी (10 सप्टेंबर) भारत आणि पाकिस्तान हे दोन संघ आमने-सामने असणार आहेत. त्याआधी विराट कोहलीचा एक खास व्हिडिओ बीसीसीआयने शेअर केला आहे.

बीसीसीआयने शेअर केलेल्या व्हिडिओमध्ये सराव सत्रादरम्यान विराट नवोदित क्रिकेटपटूंना मार्गदर्शन करत असल्याचे दिसत आहे. हे क्रिकेटपटू नेट गोलंदाज असल्याचा कयास लावला जात आहे.

दरम्यान, विराट नवोदित क्रिकेटपटूंना यशस्वी होण्यासाठी लागणाऱ्या महत्त्वाच्या गोष्टींबद्दल सांगत आहे. तसेच त्याने कौशल्य, फिटनेस आणि मानसिक कणखरता यांचेही महत्त्व या क्रिकेटपटूंना सांगितले. त्याचबरोबर छोट्या छोट्या गोष्टींवरही लक्ष देण्यास त्याने सांगितले.

याशिवाय विराटने सल्ला दिलेल्या क्रिकेटपटूंपैकी एकाने सांगितले की विराटने त्यांना प्रोफेशनल राहा आणि स्वत:वर विश्वास ठेवण्यास सांगितले. तसेच शेवटी सरावच तुम्हाला परिणाम देतो असेही सांगितले. त्याचबरोबर या क्रिकेटपटूने सांगितले की विराटला सराव करताना पाहून देखील त्यांना खूप शिकायला मिळते.

दरम्यान, या व्हिडिओवर बऱ्याच प्रतिक्रिया येत असून अनेकांनी विराटचे कौतु केले आहे. या व्हिडिओला बीसीसीआयने कॅप्शन लिहिले आहे की 'प्रेरणायी चर्चेसह तुमच्या विकेंडची सुरूवात करा. विराट कोहलीने नवोदीत क्रिकेटपटूंबरोबर त्याचा अनुभव सांगितला आहे.'

तयारी सुपर फोरची

भारतीय संघ पाकिस्तानविरुद्धच्या सामन्याने सुपर फोर फेरीतील आपली मोहिम सुरू करेल. भारताला 12 सप्टेंबर रोजी श्रीलंकेविरुद्ध सामना खेळायचा आहे, तर 15 सप्टेंबर रोजी बांगलादेशविरुद्ध सामना होणार आहे.

या फेरीसाठी भारतीय संघाने कसून तयारी केली आहे. त्याचे फोटोही बीसीसीआयने शेअर केले होते. तसेच भारतीय संघातील खेळाडूंनी जिममध्येही घाम गाळला आहे.

आशिया चषकात भारताने साखळी फेरीत दोन सामने खेळले आहेत. त्यातील पाकिस्तानविरुद्धचा सामना पहिल्या डावानंतर पावसामुळे रद्द झाला, तर नेपाळविरुद्धचा सामन्यातही पावसाचा व्यत्यय आला होता. पण भारताने डकवर्थ लुईस नियमानुसार 10 विकेट्सने विजय मिळवला.