Vijay Merchant Trophy: साईने खिंड लढवल्याने हैदराबादविरुद्ध गोव्याचा डाव सावरला

Vijay Merchant Trophy, Goa vs Hyderabad U16, 1st Day:

साई नाईक याच्या तळाच्या फलंदाजांसह खिंड लढविल्यामुळे विजय मर्चंट करंडक १६ वर्षांखालील क्रिकेट स्पर्धेत हैदराबादविरुद्ध पहिल्या डावात गोव्याला थोडेफार सावरता आले. पहिल्या डावात त्यांनी सर्वबाद १८६ धावांची मजल मारली.

सूरत येथील खोलवाड जिमखाना मैदानावर तीन दिवसीय सामन्याला बुधवारी सुरवात झाली. मागील लढतीत सौराष्ट्राला हरविलेल्या गोव्याने नाणेफेक जिंकून प्रथम फलंदाजी स्वीकारली. सामन्याच्या पहिल्या दिवशी खेळ थांबला तेव्हा हैदराबादने १ बाद ३८ धावा केल्या होत्या.

सलामीच्या स्वप्नेश नाईक याच्या ३३ धावांनंतरही गोव्याचा पहिला डाव ६ बाद ८१ असा घसरला. साई याने संयमी फलंदाजीच्या बळावर शमिक कामत (२६) याच्यासमवेत सातव्या विकेटसाठी ५५ आणि नंतर आठव्या विकेटसाठी द्विज पालयेकर (१७) याच्यासमवेत ३९ धावांची भागीदारी करून गोव्याला सावरण्याचा प्रयत्न केला.

अश्विनन राम याने साई याला त्रिफळाचीत बाद केल्यानंतर गोव्याचा डाव जास्त लांबला नाही. साई याने १०९ चेंडूंत पाच चौकारांच्या मदतीने ४३ धावा केल्या.

संक्षिप्त धावफलक

गोवा, पहिला डाव: ७५.३ षटकांत सर्वबाद १८६ (आराध्य गोयल १६, स्वप्नेश नाईक ३३, शुधित गुरव ०, रेयान केरकर १, प्रद्युम्न अटपडकर १५, चिगुरुपती व्यंकट ८, साई नाईक ४३, शमिक कामत २६, द्विज पालयेकर १७, समर्थ राणे ६, ओम खांडोळकर नाबाद १, प्रेम गोणे १७-२, बी. अश्विन राम ४९-२, व्ही. यशवीर ३३-४).

हैदराबाद, पहिला डाव: १२ षटकांत १ बाद ३८ (जसवंत मोटे नाबाद १७, आदित १७, समर्थ राणे ६-१-१४-१, शमिक कामत ४-०-२०-०, द्विज पालयेकर २-०-२-०).