Jonty Rhodes Video Viral: जॉन्टी ऱ्होड्सच्या माणूसकीनं मन जिंकलं! ग्राउंड्समनच्या मदतीला असा आला धावून...

Jonty Rhodes Helping Hands to Groundstaff: इंडियन प्रीमियर लीग 2023 स्पर्धेत बुधवारी लखनऊ सुपर जायंट्स विरुद्ध चेन्नई सुपर किंग्स यांच्यात सामना होणार होता.

पण भारतरत्न श्री अटल बिहारी वाजपेयी एकाना क्रिकेट स्टेडियमवर होणारा हा सामना 19.2 षटकांचा खेळ झाल्यानंतर पावसामुळे रद्द करण्यात आला होता. पण या सामन्यात दिग्गज क्रिकेटपटू जॉन्टी ऱ्होड्सने ग्राउंड्समनला केलेल्या मदतीने सर्वांची मनं जिंकली आहेत.

या सामन्यात लखनऊ संघाने प्रथम फलंदाजी केली होती. पण 19.2 षटकांचा खेळ झाल्यानंतर पावसाला सुरुवात झाली आणि सामना थांबवण्यात आला. दरम्यान, पाऊस येत असताना ग्राउंड्समन खेळपट्टी झाकण्यासाठी कव्हर्स मैदानात घेऊन येत होते.

यावेळी लखनऊचा क्षेत्ररक्षक प्रशिक्षक जॉन्टी ऱ्होड्सने ग्राउंड्समनला मदतीचा हात पुढे केला. त्याने त्यांच्याबरोबर ते कव्हर मैदानात ओढत आणले. यावेळी एका सदस्याने त्याला आदराने कव्हर ओढण्याचे काम न करण्यास सांगितले.

पण जॉन्टी त्याचे न ऐकता पुन्हा ग्राउंड्समनला मदतीसाठी गेला. यावेळी तो त्या सदस्याला मजेने चिडवतानाही दिसला.

हा व्हिडिओ आयपीएलच्या सोशल मीडिया अकाउंट्सवर शेअर करण्यात आला आहे. या व्हिडिओने अनेक चाहत्यांची मने जिंकली असून लाखो युजर्सने लाईक्स दिल्या आहेत. तसेच चाहते ऱ्होड्सचे कौतुकही करत आहे.

सामना रद्द

दरम्यान, बुधवारी लखनऊ विरुद्ध चेन्नई सामन्यात नाणेफेकीलाही पावसामुळे उशीर झाला होता. मात्र 19.2 षटकात लखनऊने 7 बाद 125 धावा केल्या असताना पावसाला पुन्हा सुरुवात झाली. त्यानंतर हा सामना पुन्हा सुरू झाला नाही. तसेच हा सामना रद्द करण्याचा निर्णय घेण्यात आला.

सामना थांबला तेव्हा लखनऊकडून आयुष बदोनीने सर्वाधिक नाबाद 59 धावा केलेल्या होत्या. तसेच चेन्नईकडून मोईन अली, मथिशा पाथिराना आणि महिश तिक्षणा यांनी प्रत्येकी 2 विकेट्स घेतल्या होत्या.

हा सामना रद्द झाल्यानंतर दोन्ही संघांना प्रत्येकी 1-1 गुण देण्यात आले. आता चेन्नईला त्यांचा पुढील सामना 6 मे रोजी मुंबई इंडियन्स विरुद्ध होणार आहे. तसेच लखनऊला त्यांचा पुढील सामना गुजरात टायटन्सविरुद्ध 7 मे रोजी खेळायचा आहे.